ABŞ-da aparılan yeni tədqiqat COVID-19 peyvəndinin ürək-damar xəstəlikləri riskinə müsbət təsir göstərə biləcəyini göstərib.
Demokrat.az xəbər verir ki, ABŞ-ın "JAMA Internal Medicine" jurnalında dərc olunan araşdırmaya görə, 2024–2025-ci illərdə COVID-19 peyvəndi alan şəxslərdə xəstəliklə əlaqəli əsas ürək-damar hadisələrinin (MACE) riski daha aşağı olub.
MACE anlayışı ürək-damar ölümü, infarkt, insult və ürək çatışmazlığı səbəbilə xəstəxanaya yerləşdirilmə hallarını əhatə edir.
1 milyondan çox veteran araşdırılıb
Tədqiqat ABŞ-dakı 1 milyondan çox veteran üzərində aparılıb. İştirakçıların orta yaşı 70,1 olub.
Alimlər müəyyən ediblər ki, peyvənddən sonra 8 aylıq dövrdə COVID-19-la əlaqəli ürək-damar riskləri ümumilikdə 38 faiz azalıb. Bu təsir xüsusilə 75 yaşdan yuxarı şəxslərdə və əlavə xəstəlikləri olanlarda daha güclü müşahidə edilib.
Tədqiqatın məhdudiyyətləri
Araşdırmada qeyd olunur ki, nəticələr əsasən yaşlı, kişi və ağdərili veteranlardan ibarət qrup üzərində aparılıb. Buna görə də nəticələrin bütün əhali üçün tam şəkildə ümumiləşdirilməsi məhdud ola bilər.
Bundan əlavə, tədqiqat müxtəlif COVID-19 variantları (Delta, Omikron və Alpha) üzrə ayrıca effektivlik analizini əhatə etməyib.
Alimlər bildirirlər ki, əldə olunan nəticələr “COVID-19 peyvəndlərinin müasir epidemioloji şəraitdə klinik və ictimai sağlamlıq baxımından rolunu anlamağa yardım edə bilər”.
COVID-19 peyvəndləri ilə bağlı mübahisələr davam edir
ABŞ Xəstəliklərə Nəzarət və Profilaktika Mərkəzinin (CDC) məlumatına görə, bəzi insanlar peyvəndlə bağlı mümkün yan təsirlərdən narahatlıq ifadə etsə də, ümumilikdə peyvəndlərin təhlükəsiz və effektiv olduğu vurğulanır.
Jalə Demokrat.az
