Müasir mətbəxdəki yaxşı yemək həmişə mürəkkəb olmaq məcburiyyətində deyil. Bu gün dünyanın ən yaxşı restoranlarında belə smaş burgerə rast gəlmək mümkündür. Yaxşı ət, düzgün bişirmə və balanslı çörək…
İçində gizlədilən xüsusi souslar və ya mürəkkəb texnikalar yoxdur. Amma smaş burger elə bir yeməkdir ki, aşpazı gizlənməyə imkan vermir: yaxşısınızsa dərhal görünür, deyilsinizsə, eyni anda üzə çıxır.
Demokrat.az xəbər verir smaş burger ilk baxışda adi hamburger kimi görünür. Amma mətbəxin içində olanlar bilir ki, bəzən ən böyük fərqi yaradan ən kiçik toxunuşdur. Bu burgerin hekayəsi də məhz buradan başlayır: qızğın tavaya qoyulan qiymənin spatula ilə basılaraq incəldilməsi. Bu üsul təkcə vizual seçim deyil, həm də dadın əsasını dəyişən texnikadır.
Yüksək temperaturda ətlə təmas zamanı səthdə karamelizə qat yaranır. Mətbəxdə buna “Maillard reaksiyası” deyilir. Məhz bu anda ətin içindəki aromalar üzə çıxır. Nəticədə xarici yüngül xırtıldayan, içi isə sulu qalan köftə əldə olunur. Smaş burgerin xarakteri də elə budur.
Klassik hamburgerlərdə daha qalın kotletlər istifadə olunur. Onlar daha yavaş bişir və içi daha sulu qalır. Smaş burger isə fərqlidir: nazik, sürətli və birbaşa nəticə verən üsulla hazırlanır. Burada səhvə yer yoxdur. Ətin keyfiyyəti, temperatur və zamanlama düzgün deyilsə, nəticə dərhal hiss olunur.
Smaş burger ilk dəfə 1920-ci illərdə ABŞ-da ortaya çıxıb və uzun müddət küçə yeməyi kimi qalib. Kiçik yeməkxanalarda və fast-food məkanlarında yayılıb. Bu gün isə dünyanın ən yaxşı restoranlarında da yer alır. Çünki müasir mətbəx artıq yaxşı bilir: dad həmişə mürəkkəb olmaq məcburiyyətində deyil.
Bu yemək bir çox aşpaz üçün sadəliyin və dürüstlüyün simvoludur. İçində gizlədiləcək çoxlu souslar və ya bəzəkli texnikalar yoxdur. Yaxşı ət, düzgün bişirmə və balanslı çörək kifayətdir. Yanına əridilmiş pendir və bir neçə turşu əlavə oluna bilər. İlk dişləmədə isə hər şey aydın olur.
Bu yanaşma əslində İtalyan mətbəxinin fəlsəfəsinə də yaxındır: az inqrediyent, düzgün texnika və maksimum dad.
Bu gün smaş burger artıq bir çox mətbəxdə yenidən şərh edilir. Hər kəs öz toxunuşunu əlavə edir. Çünki bir yeməyi sadəcə kopyalamaq yox, onu anlamaq və yenidən yaratmaq vacibdir.
Nə lazımdır?
◊ 600 q dana qiyməsi (təxminən 20% yağlı ideal seçimdir) ◊ 4 ədəd burger çörəyi ◊ 8 dilim çeddar pendiri ◊ 1 böyük soğan (nazik doğranmış) ◊ 8–10 ədəd kornişon turşusu ◊ duz ◊ istiot
Sous üçün:
◊ 4 xörək qaşığı mayonez ◊ 1 xörək qaşığı ketçup ◊ 1 çay qaşığı xardal ◊ 1 çay qaşığı turşu suyu
Bu resept sürətli, amma xarakterli bir seçim kimi günün istənilən vaxtında yaxşı yemək istəyənlər üçün uyğundur.
Jalə Demokrat.az
