Qiymə bişirərkən onun dərhal su verməsi və bərk olması bir çox evdar xanımın qarşılaşdığı əsas problemlərdən biridir. Peşəkar aşpazlar ətin şirəli və yumşaq qalması üçün xüsusi "şoklama" və "limon" üsulundan istifadə edirlər.
Demokrat.az-ın məlumatına görə bu prosesdə ən çox edilən səhv qiyməni soyuq tavaya əlavə etməkdir. Tava dumanı çıxana qədər yaxşıca isidilməlidir ki, ət qaynar səthlə təmasda olan kimi xarici təbəqəsi möhürlənsin. Beləcə ətin su verməsinin qarşısı alınır və şirəsi daxilində qalır. Həmçinin qiyməni tavaya qoyan kimi dərhal qarışdırmaq olmaz. Bir tərəfi rəngini dəyişdikdən sonra hissə-hissə çevirmək daha yaxşı nəticə verir.
Bişmə prosesində bir neçə damcı limon suyundan istifadə etmək ətin liflərini yumşaldır. Limon turşusu proteinlərin sıx bağlanaraq sərtləşməsinin qarşısını alır. Nəticədə qiymə dənəvər olur və bir-birinə yapışmır. Digər mühüm məqam isə duzun vaxtında əlavə edilməsidir. Duzu əvvəlcədən tökmək qiymənin dərhal su verməsinə səbəb olur. Bu səbəbdən ədviyyatlar ət tam bişməyə yaxın olanda əlavə edilməlidir.
Soğanlı qiymə hazırlayarkən də ardıcıllığa diqqət yetirmək lazımdır. Aşpazlar əvvəlcə qiyməni qovurmağı, rəngi döndükdən sonra soğanı əlavə etməyi məsləhət görürlər. Bu üsul soğanın su verməsinin qovrulma prosesinə mane olmasının qarşısını alır.
