Cənubi Koreyada iki nəfərin ölümü ilə nəticələnən hadisənin tükürpədici detalları üzə çıxıb. Paytaxt Seulda hüquq-mühafizə orqanları 20 yaşlı qadını qəsdən adam öldürməkdə ittiham edir. İstintaq materiallarına görə, saxlanılan şəxs cinayətləri törətməzdən əvvəl süni intellekt platforması olan ChatGPT-dən məsləhətlər alıb.
The Korea Herald nəşrinin verdiyi məlumata görə, şübhəli şəxs qurbanlarını zəhərləmək üçün xüsusi üsul hazırlayıb. O, özünə məxsus psixiatrik dərmanları spirtli içkilərə qataraq qarşı tərəfə təqdim edib. Polisin apardığı texniki araşdırma zamanı qadının süni intellektə yuxu dərmanlarının alkoqol ilə qarışdırılmasının fəsadları barədə suallar ünvanladığı məlum olub. O, proqramdan bu qarışığın nə dərəcədə təhlükəli olduğunu və ölümə səbəb olub-olmayacağını dəqiqləşdirib.
Hadisələrin ardıcıllığı qadının motel görüşləri zamanı reallaşıb. İlk qurbanın cəsədi motel otaqlarının birində tapıldıqdan sonra bənzər ssenari ilə ikinci ölüm faktı qeydə alınıb. İstintaq orqanları hesab edir ki, ChatGPT-də edilən axtarışlar qadının hərəkətlərinin təsadüfi olmadığını və nəticələri əvvəlcədən bildiyini sübut edir.
Saxlanılan qadın artıq dərmanları içkiyə qatdığını etiraf edib. Hazırda məhkəmə prosesi davam edir və onun psixi sağlamlıq vəziyyəti də araşdırılan mövzular arasındadır. Bu hadisə texnologiyadan cinayət məqsədilə istifadə edilməsi mövzusunda ölkədə ciddi müzakirələrə yol açıb.
Jalə Demokrat.az
