“Azərbaycan ilə BƏƏ arasında münasibətlərin inkişafı birbaşa olaraq turizm sektoruna da müsbət təsir göstərir”.
Bunu turizm mütəxəssisi Rahib İsmayılov Demokrat.az-a açıqlamasında bildirib.
O deyib ki, siyasi və iqtisadi əlaqələrin güclənməsi turistlərin iki ölkə arasında səyahətə olan marağını artırır: “Belə bir kontekstdə vizaların sadələşdirilməsi və birgə turizm təşəbbüsləri turistlərin hərəkətini asanlaşdırır. BƏƏ-dən Azərbaycana gələn turistlər daha çox işgüzar səfərlər, mədəni və tarixi turizm proqramları ilə maraqlanır ki, bu da yerli turizm infrastrukturunun inkişafına təkan verir. Azərbaycanda otel, restoran və xidmət sahələrinin beynəlxalq standartlara uyğunlaşdırılması zərurəti artır. Azərbaycanda lüks turizm imkanlarının genişləndirilməsi, dəniz və dağ turizminin inkişafı üçün BƏƏ investorlarının marağı artır”.
O bildirib ki, bu əməkdaşlıq nəticəsində turizm sektoru üçün yeni iş yerləri açılır və regionlarda iqtisadi fəallıq yüksəlir: “Hava yollarının genişləndirilməsi və birbaşa reyslərin açılması iki ölkə arasında turistlərin rahat hərəkətini təmin edir. Marketinq və reklam sahəsində birgə layihələr, BƏƏ turistlərinin Azərbaycanı tanıması üçün effektiv vasitə rolunu oynayır. Eyni zamanda, kulinariya və mədəniyyət turizmi üzrə proqramların hazırlanması ölkənin turizm məhsulunu zənginləşdirir. Bu əməkdaşlıq həmçinin regional turizm marşrutlarının yaradılmasına imkan verir. Azərbaycan–BƏƏ münasibətləri turizmin müxtəlif sahələrinin inkişafına töhfə verir, həm investisiya axını, həm də turist marağını artırır. Bu, uzunmüddətli perspektivdə ölkənin turizm brendinin beynəlxalq səviyyədə tanınmasına xidmət edir və Azərbaycanın turizm potensialını maksimal səviyyədə reallaşdırır”.
Leyla Turan Demokrat.az
