Peyvənd olunmayan müəllimlərin nəzərinə: Ənənəvi tədrisdən kənarda qala bilərlər

“Bir ildən artıqdır ki, pandemiya səbəbindən dərslər onlayn-distant qaydada həyata keçirilir. Bu formada tədrisin keyfiyyətindən hər birimiz xəbərdarıq. Ümumiyyətlə, hər kəs normal həyata qayıtmaq istəyir. Bunun hazırda baş verməsi üçün vaksinasiya qaçılmazdır”.

Demokrat.az xəbər verir ki, bunu təhsil üzrə eksperti Kamran Əsədov deyib.

“Bilirik ki, Azərbaycanda yanvar ayından vaksinasiya başlayıb və artıq təhsil müəssisələrində çalışan işçilər də vaksinasiya olunur. Bu günə qədər böyük sayda müəllim və digər işçilər vaksinasiya olunub. Öncə qeyd edim ki, vaksinasiya olunma könüllüdür, məcburi xarakter daşımır və vaksinasiya olunmayanlara qarşı heç bir cəza və ya işdən azad olunma nəzərdə tutulmur. Vaksinasiya olunma məcburi deyil, zəruridir və könüllüdür. Bəzi müəllimlər vaksinasiya olunmaq istəmir. Bu da onların hüququdur. Amma məsələnin həlli yolu odur ki, ənənəvi tədris bərpa olunanda, vaksinasiya olunmuş müəllimlər dərsləri normal qaydada siniflərdə təşkil etsinlər, olunmayanlar isə tədrisi onlayn-distant qaydada həyata keçirsinlər. Hesab edirəm ki, yeganə çıxış yolu bu ola bilər. Çünki vaksinasiya olunmayanlar potensial yoluxma təhlükəsi qarşısında qalırlar” – K.Əsədov qeyd edib.

Demokrat.az