Səhərlər limonlu su içmək bir çox insanın gündəlik vərdişinə çevrilib. Mütəxəssislər bu içkinin orqanizmə bir sıra müsbət təsirlərinin olduğunu, xüsusilə su balansının qorunmasına və həzm sisteminin fəaliyyətinə kömək etdiyini bildirirlər.
Demokrat.az xəbər verir ki, bu barədə "Health" portalı yazıb.
Mütəxəssislərin sözlərinə görə, gecə ərzində insan orqanizmi tənəffüs və tərləmə nəticəsində müəyyən qədər maye itirir. Səhər su içmək itirilmiş mayenin bərpasına kömək edir. Suya limon şirəsi və bal əlavə edilməsi isə içkinin dadını yaxşılaşdıraraq müntəzəm maye qəbulunu asanlaşdıra bilər.
Limonun tərkibindəki C vitamini immun sisteminin normal fəaliyyətini dəstəkləyir və hüceyrələrin oksidləşdirici zədələnmədən qorunmasına kömək edir. İlıq su isə bağırsaq əzələlərinin rahatlamasına, həzm prosesinin yaxşılaşmasına və qəbizliyin qarşısının alınmasına müsbət təsir göstərə bilər.
Bal əlavə edilmiş limonlu su boğaz ağrısı və öskürək zamanı da müəyyən rahatlıq yarada bilər. Maye bəlğəmin durulaşmasına, bal isə boğazdakı qıcıqlanmanın azalmasına kömək edir. Xüsusilə soyuqdəymə və digər tənəffüs yolu infeksiyaları zamanı bu içki narahatlığı yüngülləşdirə bilər.
Dietoloqlar hesab edirlər ki, səhər limonlu su içmək iştahanın müəyyən qədər azalmasına, səhər yeməyindən əvvəl aclıq hissinin sakitləşməsinə və şəkərli, kalorili içkilərə meylin azalmasına kömək edə bilər. Bu baxımdan həmin vərdiş çəkiyə nəzarət etmək istəyənlər üçün də faydalı ola bilər.
Limonlu su necə hazırlanmalıdır?
Mütəxəssislər içkinin otaq temperaturunda hazırlanmasını tövsiyə edirlər. Bunun üçün bir stəkan suya yarım limonun şirəsini sıxmaq, daha sonra bir xörək qaşığı bal əlavə edərək qarışdırmaq kifayətdir. Mədə həssaslığı olanlar limon şirəsinin miqdarını azalda bilərlər.
İçkini səhər yeməyindən əvvəl qəbul etmək mümkündür. Bununla belə, mədə xorası və digər mədə xəstəlikləri olan şəxslərə acqarına limonlu su içməzdən əvvəl həkimlə məsləhətləşmək tövsiyə olunur.
Digər vacib məqam isə dişlərin qorunmasıdır. Limonun turşusu diş minasına zərər verə biləcəyindən, içdikdən sonra ağzı adi su ilə yaxalamaq məsləhətdir.
