Bürclər arasında emosional xüsusiyyətləri, güclü hissləri və mürəkkəb xarakteri ilə seçilən birinin olduğu bildirilir. Söhbət Əqrəb bürcündən gedir.
Demokrat.az xəbər verir ki, bu barədə Laopinion.com nəşri astrologiya ilə bağlı araşdırmaya istinadən yazıb.
Astroloji şərhlərə görə, Əqrəblər zodiak dairəsinin ən sirli və emosional nümayəndələrindən hesab olunur. Onlar insanlarla münasibətlərdə səmimiyyətə, sədaqətə və dərin bağlılığa xüsusi əhəmiyyət verirlər. Yeni tanış olduqları şəxslərə dərhal etibar etməyən Əqrəblər əvvəlcə qarşı tərəfi yaxından tanımağa üstünlük verirlər.
Bu bürcün nümayəndələrinin xarakterində qısqanclıq, sahiblik hissi və xəyanətə qarşı həssaslıq əsas xüsusiyyətlər kimi göstərilir. Güclü emosional bağlılıq bəzən onların münasibətlərdə həddindən artıq nəzarətçi və şübhəçi davranmasına səbəb ola bilər.
Əqrəblər eyni zamanda birbaşa danışmaqları ilə fərqlənirlər. Onlar narazılıqlarını gizlətməkdənsə, fikirlərini açıq şəkildə ifadə etməyə meyillidirlər. Lakin bu xüsusiyyət bəzən ətrafdakılar tərəfindən kobudluq və aqressivlik kimi qəbul edilə bilər.
Astroloji yanaşmaya əsasən, bu bürcün nümayəndələri xəyanəti və etimadın pozulmasını uzun müddət unutmurlar. Onlar güvəndikləri insan tərəfindən aldadıldıqlarını hiss etdikdə həmin şəxslə münasibətlərini birdəfəlik kəsməyə də üstünlük verə bilərlər.
Qeyd edək ki, bu xüsusiyyətlər bütün Əqrəblərə aid deyil. Astrologiya elmi cəhətdən təsdiqlənmiş sahə hesab olunmadığından, insanın xarakterini yalnız doğulduğu bürclə əlaqələndirmək düzgün deyil.
