Qış aylarında döşəməni təmiz saxlamaq çətinləşir. Ayaqqabılarla evə daşınan palçıq, qar və yol duzu təmizlənmiş səthlərin qısa müddətdə yenidən çirklənməsinə səbəb olur. Mütəxəssislər isə bu problemin həlli üçün demək olar ki, hər evdə olan sadə bir məhsuldan istifadə etməyi məsləhət görürlər.
Demokrat.az xəbər verir ki, bu barədə UNIAN nəşri yazıb.
Söhbət limon şirəsindən gedir. Təmizlik zamanı ilıq su ilə doldurulmuş vedrəyə bir limonun şirəsini əlavə etmək tövsiyə olunur. Təxminən yarım stəkan limon şirəsi döşəmənin yuyulması üçün kifayət edir. Daha yaxşı təmizləmə effekti əldə etmək istəyənlər qarışıma bir qədər sirkə də əlavə edə bilərlər.
Təmizlik üzrə mütəxəssislərin sözlərinə görə, limon şirəsinin tərkibindəki turşuluq kafel və vinil səthlərdəki yüngül çöküntülərin təmizlənməsinə kömək edir. Bundan əlavə, evdə xoş sitrus ətri yaranır və döşəmə daha parlaq görünür.
Fantastic Services təmizlik şirkətinin mütəxəssisi Tatyana Dimitrova bildirib ki, təzə limon şirəsi səthlərdə xoş qoxu saxlayır və yüngül çirklənmələrin aradan qaldırılmasına kömək edir.
Evdə limon yoxdursa, onu portağal qabıqları ilə də əvəz etmək mümkündür. Bunun üçün qabıqları qaynar suda bir müddət qaynatmaq, daha sonra alınan məhlulu süzüb döşəmə yuyulan suya əlavə etmək lazımdır.
Bu üsul bütün döşəmələr üçün uyğun deyil
Mütəxəssislər xəbərdarlıq edirlər ki, limon şirəsi və sirkə tərkibli qarışıq hər növ döşəmə örtüyündə istifadə edilməməlidir. Xüsusilə mərmər, travertin, əhəngdaşı və terrazzo səthlər üçün bu üsul məsləhət görülmür. Turşu tərkibli məhlullar həmin materialların səthinə zərər verə bilər.
Belə örtüklərin təmizlənməsi üçün neytral pH göstəricisinə malik vasitələrdən istifadə etmək tövsiyə olunur.
Qarışığı bütün döşəməyə tətbiq etməzdən əvvəl kiçik və gözəçarpmaz sahədə yoxlamaq da vacibdir.
