"Fənərbağça"nın baş məşqçisi Emre Belözoğlu qış transfer pəncərəsi üçün rəhbərliyə üç mövqeyə futbolçu alınması ilə bağlı müraciət edib.
Demokrat.az xəbər verir ki, "Fanatik" nəşrinin məlumatına görə, İstanbul təmsilçisi müdafiə, yarımmüdafiə və hücum xəttini gücləndirməyi planlaşdırır.
Məlumata əsasən, müdafiə xətti üçün əsas namizədlərdən biri Fransanın "Strasburq" klubunda çıxış edən danimarkalı Lukas Högsberqdir. Həm mərkəz müdafiəçisi, həm də sağ cinah müdafiəçisi kimi oynaya bilən futbolçuya Belözoğlunun daha çox üstünlük verdiyi bildirilir. Belçikanın "Union Sen-Jillua" klubunun gənc futbolçusu Massire Sylla da namizədlər arasındadır.
Yarımmüdafiənin gücləndirilməsi üçün isə Braziliya klublarında çıxış edən Danilo və Andre nəzərdə tutulub. Bildirilir ki, Belözoğlu hər iki futbolçunun transferinə müsbət yanaşıb. Baş məşqçi bu mövqedə dinamizmi artıran, topla irəli çıxmağı bacaran və oyunun tempinə təsir göstərə bilən futbolçu istəyir.
Hücum xəttində isə əsas hədəf Madrid "Real"ının braziliyalı futbolçusu Endrikdir. 20 yaşlı hücumçunun qış fasiləsində komandadan ayrılmağa hazırlaşdığı iddia olunur. "Fənərbağça"nın gənc futbolçunu icarəyə götürmək üçün İspaniya klubuna rəsmi təklif göndərməsi gözlənilir.
Qeyd edək ki, "Fənərbağça" rəhbərliyi qış transfer pəncərəsi ilə bağlı hazırlıqlara başlayıb. Emre Belözoğlunun istəyinə uyğun olaraq hər üç mövqeyə hədəf transferlərin həyata keçirilməsi planlaşdırılır.
