2027-ci ili fərqli və maraqlı yeməklə qarşılamaq istəyənlər üçün "Qarlı keçi" salatı alternativ seçim ola bilər. Keçi ilinin simvoluna uyğun hazırlanan bu yemək həm dadı, həm də qeyri-adi görünüşü ilə bayram süfrəsinin diqqətçəkən təamlarından birinə çevrilə bilər.
Demokrat.az xəbər verir ki, bu barədə "Sterleqrad" nəşri yazıb.
Salatın əsas xüsusiyyəti onun keçi başı formasında hazırlanmasıdır. Reseptdə bahalı və ya ekzotik məhsullardan istifadə edilmir. Əsas inqrediyentlərə qaynadılmış ət, kartof, kök, duzlu xiyar, yumurta və bərk pendir daxildir.
Salatın hazırlanması üçün 300 qram qaynadılmış mal və ya donuz əti, 300 qram kartof, 200 qram kök, üç yumurta, 150 qram duzlu xiyar, 100 qram bərk pendir və 120-150 qram mayonez lazımdır. Bəzək üçün isə 50 qram zeytun, 150 qram şirin bolqar bibəri, göyərti və təxminən 50 qram konservləşdirilmiş qarğıdalı istifadə olunur.
Salat necə hazırlanır?
Əvvəlcə ət qaynadılaraq soyudulur və kiçik kub formasında doğranır. Kartof və kök qabıqlı halda bişirilir, soyuduqdan sonra təmizlənərək sürtgəcdən keçirilir. Yumurtalar bərk bişirilir, duzlu xiyar xırda doğranaraq artıq suyundan təmizlənir. Pendir də ayrıca sürtgəcdən keçirilir.
Böyük və yastı boşqabda ilk olaraq kartof keçi başının formasında düzülür. Üzərinə nazik mayonez qatı çəkilir. Daha sonra ət, kök, duzlu xiyar və yumurta ardıcıllıqla əlavə olunur. Sonuncu qat isə sürtgəcdən keçirilmiş pendirlə örtülür.
Keçi formasını necə yaratmaq olar?
Salatın görünüşünü tamamlamaq üçün zeytunlardan gözlər, burun dəlikləri və ağız ətrafının konturları hazırlanır. Bolqar bibəri ağız və digər dekorativ elementlərin düzəldilməsi üçün istifadə edilir. Qulaqlar pendir və zeytun parçaları ilə bəzədilə bilər. Boşqabın kənarlarına göyərti və qarğıdalı dənələri əlavə etmək də mümkündür.
Hazır salatın formasını saxlaması və dadının daha yaxşı qarışması üçün onu süfrəyə verməzdən əvvəl 1-2 saat soyuducuda saxlamaq tövsiyə olunur.
Nəşrin yazdığına görə, "Qarlı keçi" salatı ənənəvi bayram yeməklərindən fərqlənmək istəyənlər üçün maraqlı seçimdir. Onun qeyri-adi təqdimatı 2027-ci ilin rəmzinə uyğun olaraq yeni il süfrəsinə xüsusi görünüş qazandıra bilər.
