Kotlet hazırlayarkən adətən donuz və ya toyuq ətinə üstünlük verilir. Lakin daha fərqli, yumşaq və şirəli yemək hazırlamaq istəyənlər üçün başqa bir alternativ də var. Söhbət həm dadı, həm də qida dəyəri ilə seçilən dana ətindən gedir.
Demokrat.az xəbər verir ki, bu barədə UNIAN Polşanın "Planeta" nəşrinə istinadən məlumat yayıb.
Dana əti asan həzm olunması, zərif quruluşu və yüksək protein tərkibi ilə seçilir. Məlumata görə, bu ətin 100 qramında təxminən 21 qram zülal var. O, həmçinin orqanizmin daha asan mənimsədiyi heme dəmirlə zəngindir. Bu maddə qırmızı qan hüceyrələrinin yaranmasında mühüm rol oynayır.
Dana ətinin digər üstünlükləri arasında B qrupu vitaminləri, xüsusilə B12, B6 və niasinin olması da qeyd edilir. Bundan başqa, tərkibindəki sink və selen immun sisteminin normal fəaliyyətini dəstəkləyir. Yağlılıq baxımından isə dana əti, düzgün hissə seçildikdə, donuz ətindən daha az yağlı ola bilər.
Dana ətindən şirəli kotlet necə hazırlanır?
Bunun üçün 500 qram dana əti nazik dilimlərə kəsilir, yüngülcə döyülür, üzərinə duz və istiot əlavə olunur. Daha sonra ət parçaları əvvəlcə una, sonra çalınmış yumurtaya, sonda isə suxarıya batırılır.
Tavada 100 qram əridilmiş kərə yağı qızdırılır və kotletlər hər iki tərəfi qızılı rəng alana qədər qızardılır. Hazır yeməyi kartof və ya təzə tərəvəz salatı ilə süfrəyə vermək tövsiyə olunur.
