Ukrayna Prezidenti Volodimir Zelenski münaqişənin hazırkı cəbhə xətti üzrə dondurulmasını nəzərdə tutan sülh sazişini qəbul etməyə hazır olduğunu bildirib.
Demokrat.az-a bu barədə danışan politoloq Rəşad Bayramov bildirib ki, Zelenskinin bu mövqeyini şərtləndirən əsas amil ABŞ-nin hərbi və diplomatik dəstəyinin gələcəyi ilə bağlı qeyri-müəyyənlikdir:
"ABŞ-nin dəstəyinin zəifləməsi Ukraynanın müdafiə planlaşdırmasını çətinləşdirə bilər. Buna görə cəbhə xəttinin dondurulması Kiyevə hərbi imkanlarını qorumaq, infrastrukturunu bərpa etmək və gələcək təhlükəsizlik mexanizmləri barədə danışıqlar aparmaq üçün vaxt qazandıra bilər. Digər mühüm səbəb müharibənin iqtisadi və humanitar yüküdür. Uzunmüddətli döyüşlər insan itkilərini artırır, enerji və nəqliyyat infrastrukturuna zərər vurur, dövlət büdcəsinə və əmək bazarına təzyiq göstərir. Ukrayna cəmiyyətinin müharibədən yorulması da siyasi qərarlara təsir edən amildir. Zelenski atəşkəsi qəbul etməyə əhalinin təhlükəsizliyini təmin etmək və diplomatik prosesə keçmək imkanı kimi baxır. Bununla belə, cəbhə xəttinin dondurulması ərazilərin hüquqi baxımdan Rusiyaya verilməsi demək deyil. Zelenskinin açıqlamasında söhbət ilk növbədə döyüşlərin mövcud mövqelərdə dayandırılmasından, daha sonra isə təhlükəsizlik təminatları barədə razılaşmadan gedir. Ukrayna rəhbərliyi Donbasdan tamamilə imtina etmək tələbinə razılaşmadığını da bildirib".
Politoloq qeyd edib ki, əsas çətinlik Moskvanın belə bir razılaşmaya hansı şərtlərlə yanaşacağıdır:
"Əgər Rusiya atəşkəsi yalnız Ukraynanın əlavə ərazi güzəştləri və ya gələcək müdafiə imkanlarının məhdudlaşdırılması müqabilində qəbul etməyə çalışarsa, danışıqlar yenidən dalana dirənə bilər. Eyni zamanda, cəbhə xəttində atəşin dayandırılması etibarlı monitorinq mexanizmi, pozuntulara cavab tədbirləri və yeni hücumların qarşısını alacaq təminatlar olmadan davamlı sülh yaratmaya bilər. Avropa İttifaqı da Zelenskinin mövqeyini müdafiə edir və Ukraynanın suverenliyinin, ərazi bütövlüyünün və uzunmüddətli təhlükəsizliyinin qorunması üçün real təminatların vacibliyini vurğulayır. Bu isə göstərir ki, mümkün razılaşma yalnız Vaşinqton və Moskvanın razılığı ilə deyil, Kiyevin və Avropanın təhlükəsizlik maraqları nəzərə alınmaqla hazırlanmalıdır.
Ümumilikdə isə Zelenskinin mövqeyi hərbi məqsədlərdən tam imtina deyil, müharibənin dayandırılması üçün daha praqmatik diplomatik mərhələyə keçid cəhdi kimi qiymətləndirilə bilər. Lakin atəşkəsin əldə olunması hələ davamlı sülhün təmin edilməsi demək deyil. Əsas məsələ Ukraynanın döyüşləri dayandırmaq müqabilində gələcəkdə özünü müdafiə etmək imkanlarını qoruyub saxlaya bilməsidir".
