Yuxunun müddətinin qidalanma və ya fiziki aktivlikdən daha güclü şəkildə ömür uzunluğunu proqnozlaşdırdığı müəyyən edilib. Gündə yeddi saatdan az yatmaq gözlənilən ömür uzunluğunun azalması ilə nəzərəçarpacaq dərəcədə əlaqəlidir.
Demokrat.az xəbər verir ki, tədqiqat "Sleep Advances" jurnalında dərc olunub.
Oreqon Sağlamlıq və Elm Universitetinin (OHSU) alimləri 2019-2025-ci illərdə ABŞ-ın müxtəlif dairələri üzrə aparılmış sorğuların məlumatlarını təhlil edərək əhalinin vərdişlərini gözlənilən ömür uzunluğu ilə müqayisə ediblər. Gündə 7-9 saat yuxu kifayət qədər, yeddi saatdan az yuxu isə qeyri-kafi hesab edilib.
Nəticə tədqiqatçıların özləri üçün də təəccüblü olub: ömür uzunluğu ilə əlaqənin gücünə görə yuxu çatışmazlığı yalnız siqaretdən geri qalıb. Modelə piylənmə və diabet də əlavə edildikdə isə yuxudan daha güclü əlaqə piylənmədə müşahidə olunub.
Tədqiqatın müəlliflərindən biri Endryu MakHill bildirib: "Yuxu çatışmazlığının ömür uzunluğu ilə bu qədər güclü əlaqəyə malik olacağını gözləmirdim".
Beləliklə, kifayət qədər yatmaqla bağlı ənənəvi tövsiyə uzunömürlülük baxımından dəbdə olan pəhrizlər və məşqlər qədər, bəzi hallarda isə onlardan daha əhəmiyyətli ola bilər.
Vacib məqam ondan ibarətdir ki, tədqiqat müşahidə xarakterlidir və ayrı-ayrı insanların deyil, dairələr üzrə orta göstəricilərə əsaslanır. Buna görə də araşdırma əlaqəni göstərir, lakin səbəb-nəticə münasibətini sübut etmir. Yuxu çatışmazlığı stress, növbəli iş və ya xəstəliklər kimi digər problemlərin göstəricisi ola bilər.
Bununla belə, nəticələr xroniki yuxu çatışmazlığının ürəyə, maddələr mübadiləsinə və immun sisteminə zərər verdiyini göstərən getdikcə artan elmi məlumatlarla uyğun gəlir. Bu nəticə yuxuya sağlamlığın tamhüquqlu amili kimi yanaşmağın vacibliyini də vurğulayır.
Həkimlər uzun müddətdir böyüklər üçün yeddi-səkkiz saatlıq yuxunu optimal norma hesab edirlər. Lakin praktikada bir çox insan bunu əhəmiyyətsiz hesab edərək daha az yatır.
Yeni məlumatlar yuxu çatışmazlığının ömrün uzunluğuna təsir edən əhəmiyyətli amil kimi siqaret çəkmə və piylənmə ilə yanaşı nəzərə alınmasının vacibliyini göstərir. Eyni zamanda, doqquz saatdan çox yatmaq da bəzi hallarda sağlamlıq problemləri ilə əlaqələndirilir. Buna görə də əsas məsələ yuxunun optimal müddətini qorumaqdır.
Jalə
