Rusiya Elmlər Akademiyasının Sibir Bölməsinin İrkutsk filialının alimləri Baykal gölünün Olxon adası yaxınlığında yüksək intensivliyə malik maqnit anomaliyası tapıblar.
Aşkar edilən anomaliyanın dəqiq mənşəyi hələlik məlum deyil. İlk ehtimallara görə, bu təzahür yer qabığının dərinlik strukturu ilə əlaqəli ola bilər.
Tədqiqatlar Rusiya Elmlər Akademiyasının Günəş-Yer Fizikası İnstitutu, Geofizika Mərkəzi və Yer Fizikası İnstitutunun mütəxəssisləri tərəfindən birgə aparılıb. Olxon adasının şimal hissəsində keçirilən maqnit çəkilişləri zamanı həm yerüstü avadanlıqlardan, həm də pilotsuz uçuş aparatlarından istifadə olunub.
Tədqiqatçılar qeyd edirlər ki, anomaliya kontinental tavaların toqquşması və hərəkəti səbəbindən yüksək seysmik aktivliyi ilə seçilən Baykal rift zonasında yerləşir. Sahə müşahidələri yekunlaşıb, növbəti mərhələdə toplanmış məlumatlar təhlil olunacaq və anomaliyanın dəqiq sərhədləri müəyyənləşdiriləcək.
