İlk ağ saçlarını görən bir çox qadın onları tamamilə boyatdırmaq üçün dərhal bərbərə getməli, yoxsa ev şəraitində başqa üsullardan istifadə etməli olduğunu düşünür. Lakin tanınmış stilist Culian Farel "Good Morning America"ya bildirib ki, saç diblərini mütəmadi olaraq boyatdırmaq ağ saçlarla mübarizənin yeganə yolu deyil.
Demokrat.az xəbər verir ki, Farel əvvəlcə insanın nə istədiyini müəyyənləşdirməyi məsləhət görür: ağ saçları tamamilə gizlətmək, yoxsa onları sadəcə daha az nəzərəçarpan etmək.
Birinci halda ağ və gümüşü tellərin saçın qalan hissəsi ilə tamamilə qarışması üçün kifayət qədər piqment tətbiq olunur. İkinci üsul isə daha yumşaqdır. Bu zaman ağ saçların ətrafına ton və həcm əlavə edilir və onlar açıq rəngli tellərə və ya melirə bənzəyir.
Ağ saçları boyamaq və gizlətmək eyni deyil
Ağ saçları yeni yaranmağa başlayanlara stilist ilk növbədə yumşaq maskalama üsulundan istifadə etməyi tövsiyə edir. Bu yanaşma salon ziyarətlərinin tezliyinə də təsir edir. Klassik saç boyası təxminən hər dörd həftədən bir saç diblərinin yenilənməsini tələb etdiyi halda, maskalama üsulu bərbərə səfərlər arasındakı müddəti 8-12 həftəyə qədər uzatmağa imkan verir.
"Rəngin yumşaq şəkildə qarışdırılması ilə başlayın. İstənilən vaxt tam örtülməyə keçə bilərsiniz. Lakin tam örtülməni əks istiqamətdə dəyişdirmək uzun və bahalı prosedurdur", deyə Farel bildirib.
Tonlaşdırıcı boya əvəzinə
Hələ daimi saç boyasına hazır olmayanlar üçün ən sadə variantlardan biri yarımpermanent tonlaşdırma və ya saçın şüşələnməsidir. Bu vasitələr saçın rəngini köklü şəkildə dəyişmir, sadəcə ona ton verir, ağ saçları gizlədir və parlaqlıq yaradır.
Farelin sözlərinə görə, effekt 4-6 həftə davam edir və tədricən yox olur. Buna görə də saç dibləri uzandıqda kəskin rəng sərhədi yaranmır.
Stilist ustadan "təbii rəngə yaxın, ağ saçları maskalamaq üçün nəzərdə tutulmuş yarımpermanent tonlaşdırma" istəməyi məsləhət görür.
Açıq rəngli tellər əvəzinə tünd tellər
Açıq rəngli tellər adi üsul olsa da, Farel bunun əksinə diqqət yetirməyi məsləhət görür. Stilist başın təpəsi, saç xətti və ayrım boyunca daha tünd tellər yaratmağı təklif edir.
Bu üsul gümüşü tellərin vizual olaraq parçalanmasına və saçda həcm effekti yaranmasına kömək edir. Nəticədə saçlar vahid şəkildə ağarmış kimi deyil, daha həcmli görünür.
"Göz ağ saç əvəzinə həcmi qəbul edir", deyə ekspert izah edib.
Jalə Demokrat.az
