Bakı Dövlət Universitetinin (BDU) Kimya fakültəsinin fiziki və kolloid kimya kafedrasının professoru Sabit Məmmədov vəfat edib.
Demokrat.az xəbər verir ki, Sabit Məmmədov 1951-ci ildə Qazax rayonunda anadan olub. 1973-cü ildə BDU-nun Kimya fakültəsini bitirib.
1981-ci ildə kimya üzrə fəlsəfə doktoru, 1996-cı ildə isə elmlər doktoru dissertasiyasını müdafiə edib. 2003-cü ildən professor elmi adını daşıyıb.
O, əmək fəaliyyətinə Zaqatalada kimya müəllimi kimi başlayıb. Daha sonra akademik Yusif Məmmədəliyev adına Neft-Kimya Prosesləri İnstitutunda, həmçinin BDU-nun neft kimyası və kimya texnologiyası kafedrasında çalışıb. 2008-ci ildən isə universitetin fiziki və kolloid kimya kafedrasında fəaliyyət göstərib.
Alim elmi fəaliyyətinə görə 2009-cu ildə “Tərəqqi” medalı ilə təltif edilib. 2019-cu ildə isə “Bakı Dövlət Universitetinin 100 illiyi (1919–2019)” yubiley medalı ilə mükafatlandırılıb.
Sabit Məmmədov 11 kitabın, 14 patentin, 40-dan çox elmi məqalə və tədris-metodiki proqramın müəllifi olub.
BDU-nun rəhbərliyi və kollektivi mərhumun ailəsinə və yaxınlarına dərin hüznlə başsağlığı verib.
Demokrat.az
