Qızılbalığı manqalda hazırlamaq göründüyü qədər çətin deyil. Lakin bir neçə sadə qaydaya əməl edilmədikdə hətta keyfiyyətli balıq belə quru və dadsız alına bilər.
Demokrat.az "Marthastewart"a istinadən xəbər verir ki, şef-aşpazların sözlərinə görə, ideal nəticə üçün ilk növbədə qalın və bərabər ölçülü, dərisi üzərində olan file seçilməlidir. Xüsusilə balığın orta hissəsindən kəsilmiş tikələr manqalda bişirmək üçün daha əlverişlidir. Dondurulmuş qızılbalıqdan da istifadə etmək mümkündür, amma onu əvvəlcədən soyuducuda tam şəkildə əridmək lazımdır.
Balığı birbaşa soyuducudan qrildə bişirməyin
Aşpazların diqqət çəkdiyi əsas səhvlərdən biri qızılbalığı soyuducudan çıxaran kimi manqalda bişirməyə başlamaqdır. Balıq bişirmədən təxminən 15-20 dəqiqə əvvəl soyuducudan çıxarılmalıdır.
File kağız dəsmalla yaxşıca qurudulmalı, daha sonra az miqdarda bitki yağı ilə yağlanmalıdır. Ədviyyatları da çoxaltmağa ehtiyac yoxdur. Qızılbalığın özünəməxsus dadını qorumaq üçün duz və istiot kifayətdir. İstəyə görə göyərti, müxtəlif ədviyyatlar və ya sitrus meyvələri əlavə edilə bilər.
Manqalın hazırlanması da vacibdir
Balığın tavaya və ya manqala yapışmaması üçün əvvəlcə manqal yaxşı qızdırılmalıdır. Tövsiyə olunan temperatur 190-230 dərəcə Selsidir.
Manqalın səthi əvvəlki yeməklərin qalıqlarından təmizlənməli və bişirmədən dərhal əvvəl az miqdarda yağla silinməlidir. Bunun üçün yağla isladılmış kağız dəsmaldan istifadə etmək olar.
Qızılbalığı tez-tez çevirməyin
Ən sadə üsul balığı dərisi aşağı olmaqla manqala yerləşdirmək, qapağı bağlamaq və onu mümkün qədər hərəkətsiz saxlamaqdır.
Balıq kifayət qədər bişdikdə manqaldan özü asanlıqla ayrılmağa başlayır. Setka izləri əldə etmək istəyənlər isə fileyi yalnız bişmənin son bir neçə dəqiqəsində çevirə bilərlər.
Qızılbalıq neçə dəqiqəyə hazır olur?
Bişirmə müddəti əsasən balığın qalınlığından asılıdır:
* 2,5 sm qalınlığında file: 8-10 dəqiqə; * daha qalın tikə: 10-14 dəqiqə; * bütöv qızılbalıq filesi: 15-25 dəqiqə.
Müddət qrilin temperaturundan və balığın ölçüsündən asılı olaraq dəyişə bilər.
Hazır qızılbalığın əti yarı şəffaf görünüşdən demək olar ki, tam qeyri-şəffaf rəngə keçməli və çəngəlin yüngül toxunuşu ilə liflərə ayrılmalıdır. Bununla belə, içərisi nəmli qalmalıdır.
Aşpazların əsas tövsiyəsi isə balığı çox bişirməməkdir. Bir qədər az bişmiş qızılbalığı yenidən manqalda saxlamaq mümkündür, lakin həddindən artıq qurumuş balığı əvvəlki şirəliliyinə qaytarmaq çətindir.
Folqa, manqal, yoxsa taxta lövhə?
Qızılbalığı birbaşa manqal üzərində bişirmək daha güclü tüstü aroması, qızarmış qabıq və setka izləri əldə etməyə imkan verir.
Folqada bişirmək isə xüsusilə yeni başlayanlar üçün daha rahatdır. Balıq yapışmır və şirəli qalır. Kəsmə taxtası formasında istifadə olunan sidr lövhəsi isə balığa yüngül oduncaq aroması verir və onun qrilə yapışmasının qarşısını alır.
Kiçik qızılbalıq tikələri və ya kub formasında doğranmış balıq üçün qril səbətindən istifadə etmək də əlverişlidir.
Beləliklə, ideal qızılbalığın əsas sirri xüsusi bir reseptdən çox, düzgün hazırlıq və bişirmə texnikasındadır: qalın və dərili file seçmək, balığı əvvəlcədən otaq temperaturuna yaxınlaşdırmaq, manqal səthini təmizləyib yağlamaq və ən əsası onu çox bişirməmək.
Jalə Demokrat.az
