İnsan 30 yaşına çatdıqda sümük toxuması ən yüksək sıxlığa malik olur. Bundan sonra isə sümüklər tədricən zəifləməyə başlayır.
Demokrat.az xəbər verir ki, bu barədə Today.com yazır.
Həkim İyen Smitin sözlərinə görə, sümük toxumasının sıxlığı sümüklərin nə dərəcədə məsaməli olduğunu göstərir və kalsiumun, eləcə də digər mineralların miqdarı ilə ölçülür. O, sümükləri süngərə bənzədərək izah edib ki, sümük toxumasının sıxlığı nə qədər az olarsa, onun daxilində bir o qədər çox boşluq və çatlar yaranır. Yaş artdıqca bu, osteoporoz riskini artırır.
Smit xəbərdarlıq edib ki, sümük kütləsinin itirilməsi artıq 20 yaşdan başlaya bilər. Buna görə də sümükləri mümkün qədər erkən “qidalandırmağa” başlamaq vacibdir.
“Düşünürəm ki, hamı kalsiumun sümüklər üçün vacib olduğunu anlayır. Lakin insanların çox vaxt dərk etmədiyi və ya diqqətdən qaçırdığı məsələ D vitamininin əhəmiyyətidir”, deyə Smit bildirib.
Kalsium möhkəm sümüklərin və dişlərin formalaşmasına kömək edir, D vitamini isə bağırsaqların kalsiumu mənimsəməsinə şərait yaradır.
“Əgər kalsium kərpicdirsə, D vitamini həmin kərpici lazım olan yerə çatdıran yük maşınıdır”, deyə həkim qeyd edib.
Smitin sözlərinə görə, kalsiumun əsas mənbələri süd məhsulları, həmçinin kalsiumla zənginləşdirilmiş bitki mənşəli süd və soya məhsullarıdır. D vitamini ilə zəngin qidalara isə yağlı balıqlar və zənginləşdirilmiş süd daxildir.
Sümüklərin sıxlığını qorumaq üçün Smit aşağıdakı məhsulları qəbul etməyi tövsiyə edir:
* yoqurt; * süd; * soya südü; * kəsmik; * qızılbalıq; * sardina; * tofu.
“Bunları mütləq birlikdə yemək lazım deyil. Ayrı-ayrılıqda qəbul edə bilərsiniz və günün hansı vaxtında yeməyinizin də əhəmiyyəti yoxdur”, ekspert vurğulayıb.
Niyə bu vacibdir?
“Sümükləriniz canlı toxumadır. Əgər onları qidalandırmır və dəstəkləmirsinizsə, onlar zəifləyir”, Smit xəbərdarlıq edib.
Həkimin sözlərinə görə, insanlar çox vaxt kalsium qəbulunu artırır, lakin kifayət qədər D vitamini almağı unudurlar. Bu halda orqanizm kalsiumun yalnız 10–15 faizini mənimsəyə bilər.
“Əgər orqanizmdə kifayət qədər D vitamini varsa, kalsiumun mənimsənilməsi 40 faizə qədər artır. Kalsium və D vitamini sümük sağlamlığını maksimum səviyyəyə çatdırmaq üçün birlikdə çalışan tərəfdaşlardır”, deyə Smit bildirib.
Bundan əlavə, sümük sıxlığının qorunmasında digər qida maddələri də mühüm rol oynayır. Bunlara zülal, maqnezium, C vitamini və K vitamini daxildir.
Jalə Demokrat.az
