Yuxuya getmə müddəti insanın sağlamlığı və yuxu keyfiyyəti haqqında mühüm məlumat verə bilər. Mütəxəssislərin fikrincə, ideal halda insan yatdıqdan sonra 10–20 dəqiqə ərzində yuxuya getməlidir.
Davranış yuxu təbabəti üzrə mütəxəssis Mişel Drerup bildirib ki, çox qısa müddətdə yuxuya getmək hər zaman yaxşı əlamət hesab olunmur. Onun sözlərinə görə, bir neçə dəqiqə ərzində yuxuya getmək bəzən yuxu çatışmazlığına və ya orqanizmin həddindən artıq yorğun olmasına işarə edə bilər.
Mütəxəssislər qeyd edir ki, böyüklər üçün tövsiyə olunan gecəlik yuxu müddəti adətən 7–9 saatdır. Kifayət qədər yatmamaq gün ərzində yuxululuq, diqqət problemləri, reaksiyaların zəifləməsi və əhval dəyişiklikləri ilə nəticələnə bilər. Harvard Tibb Məktəbinin məlumatına görə, uzunmüddətli yuxu çatışmazlığı piylənmə, diabet, ürək-damar xəstəlikləri və digər ciddi sağlamlıq problemləri riskini artıra bilər.
Digər tərəfdən, yuxuya getməyin 30 dəqiqədən çox çəkməsi də diqqət tələb edən haldır. Bu vəziyyət xroniki yuxusuzluğun əlaməti ola bilər. Mütəxəssislər bildirir ki, stress, narahatlıq, depressiya, yuxu apnesi və huzursuz ayaq sindromu yuxu problemlərinə səbəb ola bilər.
Yuxu mütəxəssisləri keyfiyyətli yuxu üçün bir sıra tövsiyələr verir. Onların arasında yatmazdan ən azı 30 dəqiqə əvvəl elektron cihazlardan uzaq durmaq, yataq otağını sərin və qaranlıq saxlamaq, həmçinin hər gün eyni saatlarda yatıb-durmaq yer alır.
Mütəxəssislərin fikrincə, əgər insan üç ay ərzində həftədə ən azı üç gecə yuxuya getməkdə çətinlik çəkirsə, həkimlə məsləhətləşməsi vacibdir. Yuxu sağlamlığın əsas hissələrindən biri hesab olunur və ona diqqət yetirmək uzunmüddətli sağlamlıq üçün mühüm rol oynayır.
Leyla Demokrat.az
