Makaron bir çox insanın sevdiyi və xüsusilə iş günlərində ideal hesab olunan yeməklərdən biridir. Adətən onun hazırlanması çox vaxt tələb etmir, lakin suyun qaynamasını gözləmək prosesi ümumi vaxtı uzadır.
Demokrat.az xəbər verir ki, kulinariya mütəxəssisləri isə makaronu daha tez və rahat hazırlamaq üçün alternativ üsul təklif edirlər.
Makaronu tavada bişirmək
“Mirror” nəşrinin yazdığına görə, ekspertlər makaronu qazanda qaynatmaq əvəzinə birbaşa tavada bişirməyi məsləhət görürlər. Bu üsulda həm makaron, həm də sous eyni anda hazırlanır və əlavə qab-qacaq yumağa ehtiyac qalmır.
Nəticədə yemək daha tez hazır olur və dad baxımından restoran səviyyəsinə yaxın nəticə əldə edilir.
Tərkibi
* 350 q spagetti * 400 q konservləşdirilmiş pomidor * 1 böyük soğan (dilimlənmiş) * 4 diş sarımsaq (dilimlənmiş) * 2 xörək qaşığı zeytun yağı * 4 xörək qaşığı pesto * 3 xörək qaşığı tomat pastası * 1 litr tərəvəz bulyonu * 1 çay qaşığı duz * 1/2 çay qaşığı qara istiot * 200 q çerri pomidor * 75 q sürtgəcdən keçirilmiş parmezan
Hazırlanma qaydası
Makaronu geniş, dərin tavaya əlavə edin. Üzərinə konservləşdirilmiş pomidor, soğan, sarımsaq, zeytun yağı, pesto, tomat pastası, duz, istiot və tərəvəz bulyonunu əlavə edin.
Orta odda, qapaqlı şəkildə təxminən 10 dəqiqə bişirin. Bu müddətdə makaron yumşalmağa başlayacaq və sous formalaşacaq.
Daha sonra çerri pomidorları əlavə edin və 3–4 dəqiqə əlavə bişirin. Makaron tam yumşalana qədər bişirməyi davam etdirin.
Hazır yeməyi boşqablara paylayın, üzərinə parmezan səpin və süfrəyə verin.
Jalə Demokrat.az
