Şokolad sevənlərin yaxşı tanıdığı parlaq gümüşü folqa sadəcə qablaşdırma elementi deyil. Mütəxəssislərin sözlərinə görə, bu nazik təbəqə şokoladın dadını, qoxusunu və keyfiyyətini qorumaqda mühüm rol oynayır.
Demokrat.az-ın məlumatına görə, qida mühəndisləri bildirirlər ki, şokoladın tərkibindəki kakao yağı xarici qoxuları asanlıqla özünə çəkə bilir. Bu səbəbdən məhsulun ətrafdakı digər ərzaq və ya məişət vasitələrinin qoxusundan təsirlənməməsi üçün alüminium folqadan istifadə olunur. Folqa şokoladı xarici mühitdən təcrid edərək onun özünəməxsus ətrinin saxlanmasına kömək edir.
Mütəxəssislər diqqətə çatdırırlar ki, alüminium örtük temperatur dəyişikliklərinin yaratdığı problemlərin də qarşısını qismən alır. Şokoladın üzərində bəzən görünən ağ ləkələr məhz kakao yağının əriməsi və sonradan yenidən kristallaşması nəticəsində yaranır. Folqa bu prosesin təsirini azaltmağa yardım edir.
Bununla yanaşı, alüminium qablaşdırma işıq, rütubət və oksigenə qarşı əlavə müdafiə təmin edir. Günəş şüaları və işıq yağların oksidləşməsini sürətləndirərək məhsulun dadını dəyişə bilər. Nəm isə şəkərin səthə çıxmasına və şokoladın görünüşünün korlanmasına səbəb olur. Folqa bu amillərin təsirini minimuma endirir.
Ekspertlər qeyd edirlər ki, plastik materiallarla müqayisədə alüminiumun üstünlüyü onun şokoladın formasını tam örtməsi və içəridə hava boşluğu yaratmamasıdır. Bu xüsusiyyət məhsulun daha uzun müddət təzə qalmasına imkan verir.
Beləliklə, şokoladın altında gizlənən gümüşü təbəqə estetik görünüşdən daha çox funksional əhəmiyyət daşıyır və məhsulun keyfiyyətini qoruyan əsas vasitələrdən biri hesab olunur.
Jalə Demokrat.az
