Karyerada uğur qazanmaq təkcə bacarıq və əzmkarlıq deyil, həm də mürəkkəb və emosional baxımdan narahatlıq yaradan qərarlar verməyə hazır olmağı tələb edir.
Demokrat.az xəbər verir ki, bu barədə biznes kouçu Dori Klark "CNBC" üçün yazdığı məqalədə bildirib.
Onun sözlərinə görə, adi insanlarla ən yüksək nəticə göstərən insanlar arasındakı əsas fərq uzunmüddətli məqsədlərin maraqları naminə hərəkət etmək bacarığıdır. Bu, narahatlıq və ya müvəqqəti itkilər yaratsa belə, onlar qərarlarını gələcəyi nəzərə alaraq verirlər.
1.“Yaxşı” imkanlardan imtina etmək
Ekspertin fikrincə, ən çətin bacarıqlardan biri cəlbedici görünən təkliflərə belə “yox” deməyi bacarmaqdır.
Onun sözlərinə görə, çoxsaylı “orta səviyyəli” imkanlar insanın həqiqətən mühüm fürsətləri görməsinə mane ola bilər.
Dori Klark qeyd edir ki, hətta maraqlı dəvətlər belə əsas məqsədlərə mane olursa, onlardan imtina etmək lazım gələ bilər. Uğurlu insanlar hər bir imkanı üç meyar əsasında qiymətləndirirlər:
* Şəxsi maraq səviyyəsi; * Karyeraya təsiri; * Razılıq veriləcəyi təqdirdə yaranacaq itkilər.
2.Xarici tanınma olmadan işləmək
İkinci çətinlik layihələr və ya bacarıqlar üzərində işləməyə davam etməkdir, hətta ətrafdan diqqət və dəstək gəlmədiyi hallarda belə.
Ekspert vurğulayır ki, inkişaf çox vaxt görünmədən baş verir və “səssizlik” şəraitində motivasiyanı qorumaq ən çətin sınaqlardan biridir.
Bununla belə, məhz bu cür davamlılıq dərin peşəkar bilik və təcrübənin formalaşmasına imkan verir və sonradan tanınmağa gətirib çıxarır.
3.Məqsədləri və kimliyi dəyişməyi bacarmaq
Üçüncü çətin addım insanın öz məqsədlərinin və ya peşə yolunun artıq daxili istəklərinə uyğun gəlmədiyini qəbul etməsidir.
Müəllifin sözlərinə görə, bir çox insanlar əvvəlki kimliklərini itirmək qorxusuna görə illərlə onlara məmnunluq verməyən sahələrdə qalırlar.
Lakin vaxtında istiqaməti dəyişmək bacarığı həm vaxtın, həm də enerjinin boşa getməsinin qarşısını alır.
Ekspert yekun olaraq bildirir ki, həqiqi və uzunmüddətli uğur çox vaxt rahatlıq deyil, əksinə, gələcəkdə davamlı nəticələr formalaşdıran narahat qərarlar qəbul etməyə hazır olmağı tələb edir.
Jalə Demokrat.az
