Yumurtalı qarışıq (scrambled eggs) tost üzərində yay aylarında tez və yüngül səhər yeməyi üçün ideal seçim sayılır. Lakin sadə görünməsinə baxmayaraq, düzgün inqrediyentlər seçilmədikdə yemək ya yanmış, ya da dadsız ola bilər.
Demokrat.az xəbər verir ki, bu barədə "Wales Online" yazır.
Bir çox insan yumurtaya daha kremli və zəngin dad vermək üçün süd əlavə edir. Lakin mütəxəssislərin fikrincə, süd əlavə rütubət yaradır və yumurtanın təbii dadını zəiflədir. Həmçinin südün tərkibindəki laktoza tez bişdiyi üçün yeməkdə yanıq dadı yarana bilər.
Bunun əvəzinə “Cooktoria” kulinariya layihəsinin təsisçisi Tanya Şeff daha sadə və effektiv bir üsul təklif edir.
Onun sözlərinə görə, yumurtalı qarışığı daha dadlı edən əsas “sirr tərkib” feta pendiridir: “Yumurtalı qarışığı sadəcə yaxşıdan super dadlıya çevirən sirr tərkib var. Bu, feta pendiridir. Feta həm teksturanı yaxşılaşdırır, həm də dadı zənginləşdirir. Əlbəttə, keyfiyyətli feta seçmək vacibdir”.
Feta duzlu məhlulda yetişdirildiyi üçün nəmliyini saxlayır və yumurtaya əlavə kremli tekstura verir, lakin süd kimi dadı sulandırmır.
Duz tərkibi də ümumi dadı gücləndirir və yumurtanın daha dolğun hiss olunmasına kömək edir.
Digər bir üstünlük isə odur ki, feta tam ərimir, yumşalaraq yeməyə ipək kimi tekstura verir və yumurtalı qarışığın yumşaqlığını qoruyur.
Nəticədə həm dadı zəngin, həm də teksturası kremli olan yumurtalı qarışıq alınır və bu, xırtıldayan tostla mükəmməl uyğunlaşır.
Yumurtalı qarışığın daha dadlı hazırlanma qaydası
Lazım olanlar: * İki dilim çörək * İki yumurta * 50 qram feta pendiri * Bir xörək qaşığı kərə yağı * Cəfəri və ya şüyüd (bəzək üçün)
Feta kifayət qədər duzlu olduğu üçün əlavə duzlamağa ehtiyac yoxdur. İstəyə görə qara istiot və digər ədviyyatlar əlavə oluna bilər.
Feta pomidor, ispanaq, avokado və ya acı bibər ləpələri ilə də yaxşı uyğunlaşır.
Hazırlanma qaydası:
Çörəyin hər iki üzünə nazik kərə yağı çəkin. Tavada az miqdarda kərə yağını qızdırın və çörəyi hər iki tərəfdən təxminən 2 dəqiqə qızılı rəng alana qədər qızardın (istəyə görə tost maşınından da istifadə oluna bilər).
Yumurtaları qabda çalın və köpüklənənə qədər qarışdırın. Tavaya yarım xörək qaşığı kərə yağı əlavə edin, yumurtaları tökün və üzərinə feta səpin.
Orta-aşağı odda 3–4 dəqiqə ərzində davamlı qarışdıraraq bişirin. Feta yumurtaya tam qarışmalı, yumurtalar isə yumşaq şəkildə bişməlidir.
Hazır yumurtalı qarışığı tostların üzərinə yayın və cəfəri, şüyüd və ya istədiyiniz ədviyyatla bəzəyin.
Sonda yumşaq, kremli və dadlı yumurtalı tost hazır olur.
Jalə Demokrat.az
