Mərci şorbası süfrələrin imtinaedilməz təamı olsa da, bişdikdən sonra yaratdığı köp çox vaxt narahatlığa səbəb olur. Qazanın içərisinə qaynayan zaman əlavə edilən bəzi məhsullarla bu problemi tamamilə aradan qaldırmaq mümkündür.
Mərcini pambıq kimi yumşaq edən, həzmini asanlaşdıran üsulları təqdim edirik
Demokrat.az xəbər verir ki, mərci xörəkləri yüksək qida dəyəri ilə faydalı olsa da, bəzi hallarda mədə-bağırsaq sistemində narahatlıq yaradır. Mətbəxdə tətbiq edilən sadə və təsirli addımlarla bu problemin qarşısını almaq, daha yüngül yemək hazırlamaq olar.
Mərcinin qaz əmələ gətirmə xüsusiyyətini yox etmək üçün ən təsirli yol onu bişirməzdən əvvəl suda saxlamaqdır. Yarımfabrikatı 4-6 saat, vaxt varsa, bir gecə öncə suda saxlamaq köp yaradan elementlərin suya keçməsini təmin edir. Ən vacib məqam isə həmin suyu xörəkdə istifadə etməmək, tökərək mərcini təmiz su ilə bişirməkdir.
Mərci dənələrinin üzərində toplanan nişasta və qalıqlar da köp şikayətlərini artıra bilər. Bu səbəbdən bişirmə mərhələsindən əvvəl mərcini ən azı 3-4 dəfə, su tamamilə şəffaflaşana qədər bol su ilə yumaq lazımdır. Bu proses həm yeməyin keyfiyyətini artırır, həm də həzm prosesini rahatlaşdırır.
Həssas mədəyə sahib olanlar mərcini qaza qoyduqdan sonra ilk qaynama suyunda qısa müddət qaynadıb bu suyu süzə bilərlər. Daha sonra yeni su əlavə edərək bişirməyə davam etmək qaz təsirini minimuma endirir.
Mərcini yüksək odda qəfil bişirmək əvəzinə, zəif odda yavaş-yavaş qaynamağa qoymaq lazımdır. Bu proses bağırsaqları narahat edən maddələrin daha yaxşı parçalanmasına kömək edir. Bişmə əsnasında suyun üzərində yaranan köpükləri qaşıqla mütləq yığıb atmaq lazımdır. Çünki bu köpüklər, noxud və lobyada olduğu kimi, həzmi çətinləşdirən amilləri özündə saxlayır.
Bişirmə zamanı qazana əlavə edilən bəzi bitki və ədviyyatlar köp probleminin kökünü kəsir. Xüsusilə zirə bu baxımdan ən faydalı vasitə sayılır. Bununla yanaşı, yeməyə atılan bir ədəd dəfnə yarpağı, azca zəncəfil və ya rəzəndə də bağırsaq fəaliyyətini tənzimləyərək həzm sistemini dəstəkləyir, xörəyə fərqli dad qatır.
Mərcinin növü də həzm rahatlığına birbaşa təsir edir. Qırmızı və qabıqsız mərcilər yaşıl və qəhvəyi növlərə nisbətən daha rahat həzm olunur. Rəfdə uzun müddət qalan, köhnə məhsullar daha çox köp yaratdığı üçün hər zaman təzə və keyfiyyətli olanlara üstünlük verilməlidir.
Yəni, mərci bişirərkən yaranan köp problemini aradan qaldırmaq üçün onu əvvəl suda saxlamaq, ilk qaynama suyunu süzmək, zəif odda bişirib köpüyünü yığmaq və içərisinə zirə, dəfnə yarpağı və ya zəncəfil əlavə etmək lazımdır.
Aytən Demokrat.az
