Psixoloqa getmək üçün dibi vurmağı gözləməyin
Hər hansı problem yaşandıqda onu tez-tez ertələmək və ya “öz-özünə keçər” düşüncəsi ilə yanaşmaq, əslində mövcud çətinlikləri daha da dərinləşdirə bilər.
Demokrat.az xəbər verir ki, 10 May Dünya Psixoloqlar Günü münasibətilə psixi sağlamlığın əhəmiyyətinə diqqət çəkən Klinik psixoloq Pelin Ankay Kudu cəmiyyətdə psixoloji dəstək alma ilə bağlı hələ də ciddi tərəddüdlərin olduğunu bildirib və peşəkar yardımın vacibliyini vurğulayıb.
Sürətli və gərgin həyat tərzi ilə artan stress və emosional yük psixi sağlamlığa daha çox təsir edir. Bir çox insan “necə olsa keçər” düşüncəsi ilə problemləri içində saxlayır. Lakin psixi sağlamlıq da fiziki sağlamlıq qədər önəmlidir.
Medipol Meqa Universitet Xəstəxanasının klinik psixoloqu Pelin Ankay Kudu bildirib ki, cəmiyyətdə “damğalanma” və “mühakimə olunma” qorxusu psixoloji dəstək almağın qarşısını alan əsas səbəblərdəndir.
Kudu qeyd edib ki, psixoloji dəstək mədəniyyəti hələ də cəmiyyətdə tam formalaşmayıb:
“Cəmiyyətimizdə güclü olmaq hər şeyi təkbaşına həll etmək kimi qəbul edilir. Halbuki ruh və bədən sağlamlığı bir bütündür. Fiziki xəstəlikdə həkimə müraciət etdiyimiz kimi, psixoloji çətinliklərdə də dəstək almaq təbii ehtiyacdır".
Onun sözlərinə görə, insanlar tez-tez etiketlənmək qorxusu səbəbindən mütəxəssisə müraciəti gecikdirirlər.
Psixoloq vurğulayıb ki, psixoloji çətinliklərin gecikdirilməsi vəziyyəti daha da ağırlaşdıra bilər:
“Psixoloji dəstək almaq üçün mütləq böyük travma yaşamaq lazım deyil. İnsan özünü yaxşı hiss etmədiyi istənilən halda müraciət edə bilər. Amma uzunmüddətli kədər, tükənmişlik, münasibətlərdə çətinlik və gündəlik funksionallığın pozulması kimi hallarda mütləq mütəxəssisə müraciət edilməlidir".
Kudu qeyd edib ki, son illərdə gənclər psixoloji dəstəyə daha açıq yanaşır, lakin bu xidmətlərin əlçatanlığı vacibdir:
“Gənclər daha çox müraciət edir, amma bu dəstəyin davamlı və əlçatan olması lazımdır".
O, valideynlərə də müraciət edərək bildirib ki, uşaqların psixoloji dəstək almasına qarşı tərəddüd sonradan daha ciddi problemlərə gətirib çıxara bilər və bu proses normal ehtiyac kimi qəbul edilməlidir.
Jalə Demokrat.az
