Bu tiramisu resepti cəmi altı əsas inqrediyent və 20 dəqiqə vaxt tələb edir. Klassik variantla müqayisədə daha sadə olsa da, eyni zəngin dadı qoruyur.
Demokrat.az xəbər verir ki, bu barədə "Express" qəzeti yazıb.
Tiramisu - dünyada məşhur olan klassik italyan desertidir. O, məxməri teksturası və şirin krem ilə yüngül qəhvə notlarının vəhdəti ilə seçilir. Adətən desert qəhvəyə batırılmış “savoyardi” biskvit qatları və “mascarpone” əsaslı kremdən hazırlanır.
“Express” jurnalında təqdim olunan bu versiyada tiramisunun xarakterik dadı saxlanılıb, lakin hazırlanma prosesi xeyli sadələşdirilib. Reseptdə yumurta istifadə olunmur və bu səbəbdən bəzi qida məhdudiyyətləri və ya allergiyası olanlar üçün də uyğundur.
İnqrediyentlər:
— “savoyardi” biskviti – 250 qram — ikiqat espresso – 1 porsiya — “mascarpone” pendiri – 250 qram — şəkər pudrası – 90 qram — yağlı qaymaq – 500 ml — vanil ekstraktı (istəyə görə) – 1 çay qaşığı — üzərinə səpmək üçün kakao tozu
Hazırlanma qaydası:
Əvvəlcə qəhvəni hazırlayıb tam soyudun ki, biskvitləri ona batıra biləsiniz. Bu müddətdə qaymağı yumşaq piklər alınana qədər çalın — yəni kütlə formasını saxlasın, amma hələ yağa çevrilməsin.
Daha sonra ayrı qabda “mascarpone”, şəkər pudrası və vanil ekstraktını hamar kütlə alınana qədər qarışdırın.
Ardınca bu qarışığı çalınmış qaymaqla ehtiyatla birləşdirin, tədricən əlavə edib yavaşca qarışdırın.
Krem hazır olduqdan sonra “savoyardi” biskvitlərini tez bir şəkildə soyumuş qəhvəyə batırın və təxminən 20×20 sm ölçülü qaba birinci qatı düzün. Üzərinə kremin yarısını yayın, sonra yenidən biskvit qatı əlavə edin və qalan krem ilə örtün.
Hazır desert ən azı 8 saat, daha yaxşı nəticə üçün isə bir gecə soyuducuda saxlanmalıdır ki, yaxşı hoparaq dadını tam açsın.
Süfrəyə verməzdən əvvəl üzərinə kakao tozu səpilə bilər. Nəticədə təxminən altı porsiya dadlı desert əldə olunur.
Jalə Demokrat.az
