Saçlarda yaranan ağlar bir çox insan üçün can sıxıcı ola bilər. Bəziləri bunu təbii proses kimi qəbul etsə də, digərləri daha gənc görünmək üçün çarə axtarır. Tez-tez salona getmək həm vaxt aparır, həm də baha başa gəlir. Kimyəvi boyalar isə uzun müddətdə saçın sağlamlığına mənfi təsir göstərir.
Bu məqamda təbiətin təqdim etdiyi ən qədim və təsirli həll yollarından biri köməyə çatır. Əsrlərdir istifadə edilən xına həm saçları bəsləyir, həm də ağları örtərək dolğun görünüş bəxş edir. Ev şəraitində asanlıqla hazırlanan bu vasitə kifayət qədər qənaətcildir.
Xına bitki yarpaqlarından əldə edilən təbii boyadır. Tərkibində kimyəvi maddə olmadığı üçün baş dərisinə zərər vermir, əksinə saç köklərini gücləndirir. Müntəzəm istifadə zamanı saçlar daha parlaq olur və kəpək problemi azalır.
Xına ağ saç tellərinə təbii rəng verərək onları gizlədir. Xüsusilə qırmızı və mis tonlarında təsirli olan bu vasitəni fərqli məhsullarla qarışdırıb tünd çalarlar almaq mümkündür. Məsələn, qəhvə, çay və ya qoz qabığı əlavə etdikdə qəhvəyi rəngə yaxın tonlar alınır.
Xınanı hazırlamaq çox sadədir. Toz halındakı xına isti su ilə qarışdırılaraq məlhəm halına gətirilir. İstəyə görə qarışığa zeytun yağı və ya qatıq da əlavə etmək olar. Hazırlanan kütlə saçın dibindən ucuna qədər bərabər şəkildə çəkilir. Saç bükülərək 2-4 saat gözlənilir və sonda bol su ilə yuyulur.
Xına kimyəvi boyalarla müqayisədə daha qalıcı təsir göstərir. Rəngin saçdan tamamilə getməsi xeyli vaxt aparır və hər növbəti istifadədə rəng daha yaxşı oturur.
Aytən Demokrat.az
