“Bu gün bu reallıqdır ki, Azərbaycanın turizm potensialı olduqca yüksəkdir. Bu potensialdan çox yaxşı istifadə etməliyik. Bu yolla ölkəmizə çoxlu turist cəlb edə və böyük vəsait qazana bilərik. Bu baxımdan Əshabi-kəhf mağarası da xüsusi əhəmiyyətə malikdir. Dünya miqyasında tanıdılmasına ciddi ehtiyac var. Ola bilsin həmkarım Qüdrət Həsənquliyev açıqlamasında bu məsələnin əhəmiyyətinə diqqət çəkmək istəyib”.
Bunu Demokrat.az-a açıqlamasında Milli Məclisin Deputatı Ceyhun Məmmədov deyib. O bildirib ki, İslam dünyasında Əsahabi-kəhf mağarasının 3 müsəlman ölkəsindən birində olması ilə bağlı fikirlər var:
“Bu mağaraların biri Azərbaycanda, biri Türkiyədə, biri isə İordaniyadadır. Kəbə məsələsinə gəldikdə onun müqəddəs yer olması dinimizə əsasən Allah-Təala tərəfindən müəyyən edilib. Onun ikincisini haradasa tikmək və ya yerini dəyişmək, çoxlu insanı ora ziyarətə cəlb etmək qeyri-mümkündür, eyni zamanda bu məsələ müsəlman dünyasında birmənalı qarşılanmayacaq”.
Qeyd edək ki, deputat, Ədalət, Hüquq, Demokratiya (ƏHD) Partiyasının sədri Qüdrət Həsənquliyev KİV-ə açıqlamasında bildirib ki, Naxçıvanda yerləşən Əshabi-Kəhfdə Məkkədəki Kəbənin eynisini tikmək olar.
Cavidan Mirzəzadə Demokrat.az
