"Hernmort Group" Məhdud Məsuliyyətli Cəmiyyətinin (MMC) direktoru marketdən saqqız oğurladığı üçün saxlanılıb.
Qaynarinfo-nun məlumatına görə, hadisə Abşeron rayonu, Xırdalan şəhəri, Nizami küçəsində yerləşən supermarketdə baş verib.
Belə ki, şirkət direktoru marketdən 420 manat dəyərində "Dirol" markalı saqqızı oğurlayıb.
27 dekabr 2023-cü il tarixdə Abşeron Rayon Polis İdarəsi tərəfindən saxlanılan şirkət direktorunun törətdiyi hadisəyə görə cinayət işinin başlanması rədd edilib. Onun barəsində İnzibati Xətalar Məcəlləsinin 227-ci maddəsi ilə protokol tərtib edilərək, məhkəməyə göndərilib.
Məhkəmənin hökmü ilə təqsirləndirilən şəxs, 1974-cü ildə Şirvan şəhərində anadan olmuş MMC direktoru inzibati xətanın törədilməsində təqsirli bilinib və Məcəllənin 31.4-1-ci maddəsinə əsasən, ona 200 saat ictimai işlər növündə inzibati tənbeh tədbiri tətbiq edilib. O, məhkəmə zalından azad edilib.
İXM-nin 28.3-1-ci maddəsinə əsasən, təqsirləndirilən şəxs üzərinə həmin işlərin yerinə yetirildiyi yerlərdə elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün xidmət etmək vəzifəsi qoyulub.
Qeyd edək ki, "Hernmort Group" MMC-nin qanuni təmsilçisi Cəfərov Sənan Cəfər oğludur. Sözügedən şirkətin İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsinə 722.356,52 manat vergi borcu var.
