“Bu terrorların əsas təşkilatçısının SEPAH olduğunu iddia etmək heç də çətin deyil” — Güneyli politoloq

“İranda diplomatik konsulluqlara qarşı törədilən bu terror aktı heç də yeni bir məsələ deyil. Belə demək mümkünsə, belə hallar İranın siyasi xəttini təşkil edir”.

Bu fikirləri Demokrat.az-a açıqlamasında Təbrizdən olan azərbaycanlı politoloq Çingiz Göytürk deyib. Siyasi şərhçi qeyd edib ki, İran maraqları toqquşduğu hansısa məqamda tərs düşdüyü ölkələrə qarşı bu cür terror aktlarını həyata keçirir:

“Ümumiyyətlə, belə terror aktları dövlətin siyasi ənənəsinə çevrilib. Bu terrorların əsas təşkilatçısının da SEPAH olduğunu, yaxud SEPAH-la bağlı qurumlar olduğunu iddia etmək heç də çətin bir məsələ deyil. Bu ölkədə daha öncə dövlətin dəstəyi ilə ABŞ, Səudiyyə Ərəbistanı səfirliyinə qarşı da törədilib. Həmçinin, Birləşmiş Ərəb Əmirliklərinə, İtaliyaya qarşı, eyni zamanda İran sərhədlərindən kənarda müxtəlif ölkələrə, ölkə nümayəndəliklərinə qarşı belə terror faktları məhz İran tərəfindən gerçəkləşdiyinin zaman-zaman şahidi olmuşuq. Məsələn, İngiltərədə son aylarda Azərbaycan səfirliyinə qarşı terror aktı da məhz İranın birbaşa əlinin olduğu faktlardan biridir. Bu inkaredilməz gerçəklikdir. Son zamanlar Azərbaycanda İranın terror fəaliyətlərinin başlıca hədəfinə çevrilməsinin kökündə yatan səbəblərdən birisi də məhz bundan ibarətdir ki, bölgədə geopolitik, geostrateji tarazlıqlar artıq tamam dəyişir. İran bu tarazlıqlarda oyunun kənarında qalıb. Azərbaycan isə güclü bir yüksəlişdədir. Bu, İranı ciddi şəkildə narahat edir və bunu özünün maraqlarına tərs hesab edir”.

“Buna diplomatik yollarla qarşılıqlı verə bilməməsi də İranı belə terror fəaliyyətlərini gerçəkləşdirilməsinə sövq edir. Digər tərəfdən, bu heç kəs üçün sirr deyil ki, İran adlanan ölkədə neçə aydır etiraz aksiyaları gedir, ciddi böhranla qarşı-qarşıyadır. Edamlarla, repressiv tədbirlərlə bunun qarşısını almaqda çətinlik çəkir. Bu etiraz aksiyalarının qarşısını almaq üçün əlavə faktorlarla müdaxilə etmək istəyir. Yəni, xarici düşmən obrazı yaratmağa çalışır. Daxildə milliyətçi obrazı yaradıb "guya İran parçalanmaq təhlükəsi altındadır" deyə etirazları aksiyalarından yayındırıb, başqa yönlərə çəkmək istəyir. Bu terror fəaliyyətinin kökündə yatan səbəblərdən birisi də budur. Ümumiyyətlə, İran bu terror fəaliyyəti ilə Azərbaycana gözdağı vermək istəyir, digər tərəfdən etiraz aksiyalarını başqa səmtə çəkmək istəyir”.

Aynurə Demokrat.az