"Azərbaycan-Avropa İttifaqı (Aİ) münasibətləri strateji tərəfdaşlıq münasibətləridir. Fundamental məsələlərdə bizim mövqelərimiz üst-üstə düşür və Azərbaycan-Avropa İttifaqı münasibətlərinin inkişafının çox geniş perspektivləri vardır. Xüsusilə də, enerji və nəqliyyat təhlükəsizliyi kimi sahələrdə Bakı-Brüssel münasibətləri çox sürətlə inkişaf etməkdədir".
Bu fikirləri Demokrat.az-a açıqlamasında Milli Məclisin üzvü Elman Nəsirov deyib. Deputat əlavə edib ki, Rusiya-Ukrayna arasında baş verən müharibə fonunda Aİ ölkələrinin enerji təhlükəsizliyi məsələləri xüsusi əhəmiyyət kəsb etməkdədir:
“Nəzərə alsaq ki, il ərzində Aİ ölkələrinin 500 milyardkub metr qaza tələbatı var və bu nöqteyi-nəzərdən Aİ Azərbaycana yeni alternativ enerji mənbəyi kimi baxır. Keçən il Azərbaycana Aİ ölkələrinə 8,2 milyard kubmetr qaz satıb. Bu il onun 9 milyardan artıq olması proqnozlaşdırılır. Gələn il isə 11 milyardkub metrdən artıq Azərbaycan qazının Avropa bazarına çatdırılması planlaşdırılır. Bu nöqteyi-nəzərdən Cənub Qaz Dəhlizi layihəsi Avropanın meqa layihəsidir və onun da təminatçısı Azərbaycan dövlətidir”.
Deputat onu da qeyd edib ki, 27 Avropa İttifaqı ölkəsinin 9-u ilə Azərbaycanla strateji tərəfdaşlığı ilə bağlı müvafiq sənədlər imzalanıb: “Eyni zamanda dünyanın bu çox mühüm iqtisadi güc mərkəzi ilə Azərbaycan arasında strateji tərəfdaşlıqla bağlı sazişin imzalanması yaxın perspektivlərin işidir və bu istiqamətdə mütləq əksəriyyət məsələlərdə artıq ortaq məxrəc əldə edilib. Bu sənədin imzalanması ilə Azərbaycan-Aİ münasibətlərində yeni səhifə açılacaq və keyfiyyətcə yeni müstəviyə qalxacaq. Bizim münasibətlərimiz regional təhlükəsizlik məsələlərində də öz ifadəsini tapır”.
Millət vəkili qeyd edib ki, hazırda Azərbaycan dövləti postmüharibə dövrünün həllini gözləyən məsələlərdə Aİ-nin fəal rolunu görür və qiymətləndirir.
"Təsadüfi deyil ki, 2021-ci ilin dekabrın 14 -də və bu ilin aprelin 6-da məhz Avropa İttifaqı Şurasının Prezidenti Şarl Mişelin təşəbbüsü və vasitəçiliyi ilə Azərbaycan və Ermənistan siyasi liderlərinin görüşü baş tutub. Bu görüşlərdə də bir sıra fundamental məsələlərlə bağlı irəliyə doğru addımlar atılıb. Beləliklə, həm siyasi dialoq, həm iqtisadi, həm ticarət, həm də enerji və nəqliyyat təhlükəzliyi kimi mühüm sferalarda Azərbaycan-Avropa İttifaqı münasibətləri sürətlə inkişaf edir və bu da hər iki tərəfin maraqlarına tamamilə cavab verir".
Aynurə Pənahqızı Demokrat.az
