"Dənizi hasarlayanlara qarşı sərt addımlar atılmalıdır" — Partiya sədrindən ÇAĞIRIŞ

Tural Abbaslı: "Dəniz ətrafı hasarlar sökülməli və dəniz xalqa qaytarılmalıdır..."

“Dənizlərin hasarlanması ilə bağlı məsələ illərdir cəmiyyətdə müzakirə predmetidir və müxtəlif platformalarda bu problemlər səsləndirilib. Hətta, yanlış xatırlamıramsa, zamanında parlamentdə Zeynəb Xanlarova da bu problemi qaldırmışdı. Təbii ki, dəniz kənarı yerlərdə yaşayan insanlar da bununla bağlı istər yerli icra hakimiyyəti orqanlarına, istərsə də mərkəzi orqanlara kifayət qədər şikayətlər göndəriblər”.

Bu fikirləri Demokrat.az-a açıqlamasında Ağ partiyanın sədri Tural Abbaslı deyib.

Partiya sədri bir sıra məmurlar tərəfindən dənizin hasarlanmasının heç də doğru addım olmadığını vurğulayıb:

“Bu, hasarlamaq deyil, bu, görməmişlikdir. Bu, dənizin sahilinin özəlləşdirilməsinə cəhddir. Bilirsiniz ki, dəniz sahilinin özəlləşdirilməsi qanunvericiliklə qadağandır. Ümumiyyətlə, dəniz sahilində 30 metr məsafədə hər hansı bir tikilinin tikilməsi, dənizə rahat giriş və çıxışın qarşısının alınması da qadağandır. Bu məsələlərdə düşünürəm ki, daha sərt addımlar atılmalıdır. Həmin ərazilərdə dənizin vizual şəkildə görünüşünün qarşısını alan tikililər sökülməlidir. Hesab edirəm ki, həmin ərazilərdə insanlar rahat şəkildə dənizə getməlidirlər. Amma görünən odur ki, bunu hasarlayanlar hakimiyyət iqtidar daxilində kifayət qədər nüfuza malik insanlardır, yaxud da sıravi vətəndaşlardır. Ola bilsin ki, iqtidarın bu insanlara gücü çatmır, yaxud da qərar verənlərin elə özləri oranı hasarlayıblar. Yəqin ki, qərar verənlərin hamısının orada hasarlanmış əraziləri var deyə, heç kimə bu məsələ sərf etmir. Yoxsa, bütün media quruluşlarında, televiziyalarda, xəbər portallarında, hər bir yerdə bu məsələlər ən kəskin formada qabardılıb. Amma təəssüf ki, hələlik bir addım yoxdur”.

T.Abbaslı qeyd edib ki, dəniz ətrafı hasarlar sökülməli və dəniz xalqa qaytarılmalıdır:

“Necə ki, bu qanunvericilikdə belə nəzərdə tutulub. Yaxşı olar ki, qanunvericiliyi dəyişsinlər desinlər ki, dəniz ancaq ağ adamlarındır, vəzifəlilərindir, oliqarxlarındır və sadə vətəndaşlar dənizi görə bilməzlər. Yaxud da, dənizə vergi qoysunlar ki, kim dənizi görmək istəyir vergi ödəsin. Yəni, bunlardan nə desən olar. Amma, həqiqətə qaldıqda, qanunvericiliklə bu hasarların hamısı bir anın içində sökülməlidir. Hətta, bu hasarları çəkənlər də cərimələnməlidirlər. Öz hasarların söküntüsünü elə özlərinə daşıtdırmaq lazımdır”.

Aynurə Pənahqızı Demokrat.az