“Azərbaycan müstəqillik qazanandan sonra qısa vaxt ərzində ABŞ onun müstəqilliyini tanıdı. 1994-cü ildə artıq böyük bir layihə - “Əsrin müqaviləsi” həyata keçirildi. Bu müqavilə ilə artıq ABŞ şirkətlərinin Azərbaycanın enerji sektorunda böyük bir payı oldu və ABŞ şirkətləri Azərbaycanda böyük iqtisadi layihələrdə iştirak etməyə başladı”
Bu fikirləri Demokrat.az-a Azərbaycan-ABŞ münasibətlərinin 30 illiyini şərh edərkən "Beynəlxalq Münasibətlər və Diplomatiya Araşdırmaları Mərkəzi"nin rəhbəri Samir Hümbətovdeyib. Politoloq qeyd edib ki, bu, ABŞ-ın xarici siyasətinə uyğun idi, eləcə də həmin dövrdə və ondan sonrakı mərhələlərdə bizim də xarici siyasətə uyğun idi:
“Bu qarşılıqlı, faydalı əməkdaşlıq kimi qiymətləndirilə bilər. Təbii ki, Co Bayden də bu məsələlərə xüsusi önəm verir. Geosiyasi, geostrateji məsələləri o göndərdiyi məktubda da vurğulayıb və Azərbaycanın ABŞ üçün nə qədər önəmli tərəfdaş, əsas etibarlı müttəfiq olduğunu göstərməyə çalışıb. Düşünürəm ki, bunların hamısı Azərbaycan üçün önəmlidir. Çünki belə bir vaxtda ABŞ prezidenti tərəfindən gələn məktub özü Azərbaycan üçün böyük bir dividentdir. Rusiyanın Ukraynaya işğalçı müharibə aparan bir mərhələdə Azərbaycana dəstək verməsi, əslində Azərbaycanın təhlüksizliyi baxımından önəmlidir. Düşünürəm ki, tərəflər arasında bu cür səmərəli münasibətlərin olması, iqtisadi, siyasi, regional, qlobal məsələlərdə həmfikir olmaları böyük bir nailiyyətdir. Bu, Azərbaycan diplomatiyası adına, eləcə də belə bir çətin, mürəkkəb şəraitdə cənab İlham Əliyevin apardığı çox bacarıqlı diplomatik gedişin nəticəsidir”.
Aynurə Pənahqızı Demokrat.az
