“Ukrayna ətrafında cərəyan edən prosesləri hamı kimi mən də izləyirəm. Əslində gümanların, proqnozların alt-üst olduğu bir zamanda yaşadığımızı da deyə bilərəm. Bəlkə də ehtimallarımızda və düşüncələrimizdə yanlışlıq olub, bu da var. Hər bir halda dünyadakı vəziyyətin olduqca mürəkkəb xarakter aldığını söyləməliyəm. Mürəkkəbliklər daxilində hərənin öz reallığının olduğu kimi, həqiqətləri və ən əsası haqqı var”.
Demokrat.az xəbər verir ki, bunu Mətbuat Şurasının sədri Əflatun Amaşov bildirib.
Ə.Amaşov qeyd edib: "Bəs, Vətənimiz Azərbaycanın haqqı nədən ibarətdir? Biz haqq deyib hayqıranlardan, bağıranlardan nə dərəcədə güclüyük? Hansı keyfiyyətlərimizlə üstünük? Bizim böyük bildiyimiz haqqlar dünya üçün nə dərəcədə əhəmiyyətə malikdir? Baxın, illərlə Qarabağ dedik, haqqımızı yedilər, sözümüzü saymazdan gəldilər. Bir siyasi reallıq yetişdi və biz Qarabağı özümüzə qaytardıq. Amma bu reallığın formalaşmasənda da əməyimiz oldu. Müharibəni isə birliyimizlə, bütövlüyümüzlə, həmrəyliyimizlə qazandıq. Azacıq zəifliyimiz, qətiyyətsizliyimiz hər şeyi bir andaca alt-üt edə bilərdi. Güclü, prinsipial olduq, ortaya iradə qoyduq və haqqımızı özümüzə qaytardıq. Haqqımızı qorumalıyıq. Əməlimizlə, sözümüzlə, düşüncəmizlə. Düşüncəmizin, sözümüzün və haqqımızın bir adı var – müstəqil Azərbaycan Respublikası. Müstəqillik şirin nemətdir. Hər cür çətinliklərimizə, məhrumiyyətlərimizə rəğmən biz ötən 30 ildə bu nemətdən daddıq, onun iyisini, qoxusunu ciyərlərimizə çəkdik. Çəkdikcə ətrafa göz gəzdirdik. “Müstəqilik”, “azadıq” deyənlərin bir çoxunun bu dəyərlərin heç həndəvərində olmadıqlarını gördük və görürük də. Onların dövlət və dövlətçilik anlayışlarındakı çatlar da nəzərimizdən yayınmadı və yayınmır. Nəticələr göz qabağındadır. Dünya da bunu görür. Dünya təpər göstərənin, ağıllının yanındadır. Dünya öz haqq anlayışı uğrunda dözüm nümayiş etdirənin, tədbirlinin haqqını tanıyır, reallığını qəbul edir. Bundan sonra da öz haqqlarımızın qorunmasında möhkəm, prinsipial və qətiyyətli olaq. Müstəqilliyimiz naminə dirəniş əzmimizi daim diri tutaq. Hərə öz işində, hərə öz vəzifəsində bunu etsin. Və inanaq. Dövlətimizə inanaq və dəstək olaq. Birlik və həmrəyliyimizlə, ağlımız və düşüncəmizlə Dövlətimizi dəstəkləyək".
Məmməd Demokrat.az
