Yanından keçən kişiyə tərs baxan idmançıdan dəhşətli əməl — Təfərrüat

KRİMİNAL 25 noy 2021, 11:26
Bakıda 2002-ci il təvəllüdlü Seyidağa şəxsi münasibətlər zəminində Azərə bıçaqla xəsarət yetirib. 

Demokrat.az-ın əldə etdiyi məlumata görə, hadisə bu ilin mayın 22-də, gecə saat 00.10-da baş verib. “Cənnət Flowers” adlı gül mağazasının qarşısında Seyidağa tərs baxmasını ona irad bildirməsi və yumruq atması səbəbindən aralarında yaranmış mübahisə zamanı üzərində olan bıçaqla Azərə 2 dəfə vurub. 

İstintaq orqanı tərəfindən Seyidağanın barəsində Cinayət Məcəlləsinin 126.1-ci (qəsdən sağlamlığa ağır xəsarət yetirmə) maddəsi ilə ittiham elan edilib. 

Cinayət işi üzrə təqsirləndirilən şəxs qismində ifadə verən Seyidağa ona elan olunmuş ittiham üzrə özünü təqsirli bilib. O bildirib ki, bir neçə müddətdir qaydasız döyüş idman növü ilə məşğul olur: “Rəhman, Ramin və Emil adlı şəxslər mənim dostlarımdır. Həmin şəxslərlə birlikdə idmanla məşğul oluram. Mayın 21-də, saat 23.00-da Rəhman, Ramin və Emillə birlikdə idman etdik. Sonra Rəhman, Emil və Ramin “Həzi Aslanov” metro stansiyasının yaxınlığına getdik. Mayın 22-də, gecə saat 00.10-da bibim oğlu Elxan ilə birlikdə idmandan çıxdıq və Rəhmangillə “Həzi Aslanov” metro stansiyasının yanında görüşdük. Bundan sonra biz r birlikdə Bakı şəhəri, Xətai rayonu, M.Hadi küçəsində yerləşən “Cənnət” adlı gül mağazasının qarşısında yerləşən oturacaqda oturduq, söhbət etməyə başladıq”.

Təqsirləndirilən şəxsin sözlərinə görə, orada cəmi 1 oturacaq olduğundan və hamı üçün oturacaqda yer olmadığından  ayaq üstə dayanıb: “Həmin vaxt Bakı şəhəri, Xətai rayonu, Ukrayna dairəsi istiqamətindən gələn 4 nəfər tanımadığım şəxs bizim yanımızdan keçdiyi zaman arxaya çevrildım, həmin şəxsləri tanıyıb-tanımadığımı bilmək üçün həmin şəxslərə baxdım. Həmin 4 şəxsi tanımadığımdan yenidən geri çevrildim. Həmin 4 nəfər şəxs bizdən təxminən 40-50 metr irəli getdikdən sonra yenidən bizim yanımıza geri qayıdaraq yaxınlaşdılar və Azər “tanış gəlirik, nə olub?” sözlərini dedi. Mən də Azərə sadəcə tanıyıb-tanımadığımı bilmək üçün baxdığımı bildirdim. Həmin vaxt bizim aramızda sözlü mübahisə baş verdi və mübahisə zamanı Azər məni yumruqla zərbə vurdu. Bizim aramızda yaranmış sözlü mübahisəyə səbəb Azərin mənə qarşı kobudluq və təhqir etməsi, eləcə də məni yumruqla zərbə vurması olub. Azərə qarşı heç bir kobudluq etməmişım. Lakin Azər məni təhqir etməyə davam etdi və bundan sonra aramızda yaranmış sözlü mübahisə əlbəyaxa davaya çevrildi. Azər ilə əlbəyaxa olduqda onun yanında olan şəxslər mənim və dostlarımın üzərinə gələrək əl-qol atdılar. Həmin vaxt  Azərgilin məndən və dostlarımdan yaşca böyük və güclü olduqlarından mənə, dostlarıma xəsarət yetirəcəklərindən qorxdum. Çünki Azər və yanında olan şəxslər məndən və dostlarımdan yaşca çox böyük və fiziki cəhətdən güclü olublar”.

Seyidağa qeyd edib ki, bütün bunları görüb və özünü qorumaq məqsədi ilə əynində olan şalvarın sağ cibində saxladığı açılıb-bağlanan bıçağı çıxarıb: “Həmin bıçaqla Azəri 2 dəfə bel nahiyəsindən vurdum. Azərə bıçaqla xəsarət yetirdikdən sonra Azər geri çəkilərək yerə yıxıldı. Bunu görüb çox qorxdum. Həmin vaxt yaşı 18 yaşım olduğundan bu hadisə mənə çox pis təsir etdi. Ona görə də həmin vaxt hadisə yerindən qaçdım. Həmin vaxt özümdə olmadım. Sonra yaşadığım evə getdim və paltarlarımı dəyişdim. Paltarlarımı dəyişdikdən sonra Cəlilabad rayonunda yerləşən evimizə getdim. Daha sonra polis əməkdaşları mənimlə əlaqə saxladılar. Polis əməkdaşlarına törətdiyim cinayət əməlini etiraf etdim. Bundan sonra Bakı şəhərinə qayıtdım. Bakı şəhərinə qayıtdıqdan sonra 36-cı Polis bölməsinə gedərək təslim oldum”.

Bu cinayət işinə Bakı Ağır Cinayətlər Məhkəməsində hakim Əli Məmmədovun sədrliyi ilə baxılıb. 

Seyidağa 1 il müddətinə azadlıqdan məhrum edilib. Onun barəsində həbs qətimkan tədbiri seçilib və məhkəmə zalından həbs edilib. 

Fariz Məlikli
Demokrat.az

SEÇİLMİŞ XƏBƏRLƏR

DİGƏR XƏBƏRLƏR

XƏBƏR LENTİ
Top