Paytaxt sakinləri yeni küçə adlarından şikayətçidir.
Məsələ ilə bağlı Bizim.Media-ya müraciət edən sakinlər bildirib ki, Pirallahı rayonu ərazisindəki bağlar massivində son günlər küçə adları dəyişdirilir.
Amma küçələrə qəribə adlar verilir. Belə ki, əvvəlki küçə adları Cənub-1-2-3-4-5-6 və s. idi.
Amma indi Cənub sözü Gürgən adı ilə əvəzlənib. Məsələn, Gürgən-1-2-3-4-5-6 və s. Halbuki, Gürgən fars mənşəli sözdür və canavar mənasını verən "gürg" sözü ilə bağlıdır. Cəm şəkilçisi – “an” ilə birlikdə, qəsəbənin adı bu dillərdən "canavarlar" kimi tərcümə olunur.
Şikayətçilər şəhidlərimizin, tarixi şəxsiyyətlərin adları yerinə, küçələrə fars mənşəli adın verilməsindən narazı olduqlarını dilə gətiriblər.
Məsələ ilə bağlı ilk olaraq Pirallahı rayon İcra Hakimiyyəti başçısının birinci müavini Vəzir Səfixanovla əlaqə saxladıq. O, Bizim.Media-ya açıqlamasında bildirib ki, Gürgən Pirallahı rayonundakı qəsəbənin adıdır:
“Yeni küçə adları da buradan götürülüb”.
“Bəs, küçələrə niyə şəhidlərin, tarixi şəxsiyyətlərin adı verilmir?” – sualımıza isə Vəzir Səfixanov “Bu başqa şöbənin səlahiyyətinə aid məsələdir”, - deyə cavab verərək, dəstəyi asıb.
Məsələ ilə bağlı Baki Şəhər İcra hakimiyyətindən isə Bizim.Media-ya bildirilib ki, son illər ərzində Baki şəhərinin inzibati ərazisində yerləşən küçələrin böyük əksəriyyətinə adların verilməsi və standartlara uyğun olmayan küçə adlarının dəyişdirilməsi prosesi həyata keçirilib:
“Sözügedən küçələrin adlarına gəldikdə isə qeyd etmək istərdik ki, Gürgən Pirallahı rayonunun inzibati ərazi vahidində qəsəbənin adıdır. Yəni küçələrin adları qəsəbənin adına uyğun olaraq adlandırılıb”.
