“Şimal axını ”nda partlayıcı maddələrin qalıqları aşkar edilib — VİDEO

DÜNYA 18 noy 2022, 17:52
İsveç prokurorluğu “Şimal axını”nda baş verən partlayışların təxribat olduğunu təsdiqləyib. Boru kəmərinin yaxınlığında partlayıcı qalıqlar aşkar edilib.

Demokrat.az
“Aklagare”yə istinadən xəbər verir ki, İsveçdə “Şimal axını”nda baş verən partlayışların səbəbləri ilə bağlı araşdırma aparan prokuror Mats Lyunqvistin sözlərinə görə, Baltik dənizində “cinayət yerində” tapılan yad əşyaların təhlili partlayıcı maddələrin olduğunu təsdiqləyib.

"Partlayışlar nəticəsində qaz kəmərlərinə ciddi ziyan dəyməsi diqqətlə sənədləşdirilib" - Mats Lyunqvist deyib.

Sızmaların 2-sinin İsveçin, digər 2-sinin isə Danimarkanın iqtisadi zonasında yerləşdiyi bildirilir. Hər iki ölkə sızmaların təsadüfi deyil, məqsədyönlü hərəkətin nəticəsi olduğuna dair əlamətlər olduğunu bildirib. Avropa İttifaqı, həmçinin bəyan edib ki, boru kəmərlərində qaz sızması təsadüfi deyil, qəsdən törədilmiş hərəkətlərin nəticəsidir.

Rusiya Prezidenti Vladimir Putin isə oktyabrın 10-u bildirib ki, Rusiyanın “Şimal axını” qaz kəmərlərində baş verən partlayışla bağlı araşdırmada iştirakına icazə verilmir.

Qeyd edək ki, “Şimal axını 1” və “Şimal axını 2”nin bir neçə xəttində qaz sızması sentyabrın sonunda baş verib. NATO hadisəni təxribat adlandırıb. Alyans insidentlə bağlı təhqiqat aparmağa çağırmış və qeyd etmişdi ki, müttəfiqlərin kritik infrastrukturuna hər hansı qəsdən hücum “vahid və qətiyyətli cavabla qarşılanacaq”.

Xatırladaq ki, Vladimir Putin hadisəni beynəlxalq terror aktı adlandırmış, Rusiya dövləti bu məsələni BMT Təhlükəsizlik Şurasında təcili müzakirəyə çıxarmışdı.

Yeniavaz.com

DİGƏR XƏBƏRLƏR

XƏBƏR LENTİ
Top