Xarici səyyahların azad edilmiş ərazilərə səfəri başa çatdı

GÜNDƏM 18 iyn 2022, 21:25
Müxtəlif ölkələrdən olan bir qrup səyyahın azad edilmiş ərazilərə səfəri başa çatıb.

“Report” xəbər verir ki, 3 gün ərzində dünyanın 10 ölkəsindən olan səyahətçilər Xocavənd, Ağdam, Şuşa, Kəlbəcər, Zəngilan, Laçın, Füzulidə olublar.

“Most Traveled People” cəmiyyətinin yaradıcısı olan San-Fransiskodan olan səyyah Çarlz Villi “Report”un sualı cavablandıraraq bildirib ki, onlar infrastrukturla bağlı görüləcək işlərlə maraqlanıblar.

“Bizim təklif etdiyimiz ilk iş yolların yenidən qurulmasıdır. Bu bölgənin təbiəti və potensialı çox böyükdür. Məni ən çox təəccübləndirən Laçında, belə dağlıq ərazidə aeroportun olmasıdır. Həmçinin Qarabağ piyada gəzintiləri üçün əla yerdir”.

Türkiyədən olan səyahətçi Uğur Dəmircan Qarabağa səfər etdiyi üçün çox xoşbəxt olduğunu bildirib.

“Biz Zəngəzur dəhlizinin tikintisinin tamamlanmasını gözləyirik, bundan sonra Türkiyədən Azərbaycana turist axını olacaq. Müharibə faciədir, lakin gözəl bir şey yaratmaq üçün fürsətdir. Qarabağda vandalizm gördüm, qorxuludur. Ağdam xüsusilə qorxuludur. Hətta insanların ziyarəti  və gələcək nəsillər üçün vandalizm nümunəsi olması üçün onu bu cür saxlamağı təklif etdim”.

Nyu-Yorkdan olan səyahətçi Liya Abmamonte öz növbəsində bildirib ki, Füzuli aeroportu və Zəngilanda tikilməkdə olan hava limanı möhtəşəmdir, uçuşların axını üçün orada müntəzəm reyslər lazımdır”.

Bütün səyahətçilər ümumi üzvlük sayı 20 min nəfər olan “Most Traveled People” cəmiyyətini təmsil edir.

DİGƏR XƏBƏRLƏR

XƏBƏR LENTİ
Top