Xalqımız Müstəqilliyin Bərpası Gününü fərqli sevinclə qeyd edir

Bir neçə gün əvvəl Milli Məclisdə “Müstəqillik Günü haqqında” qanun layihəsi qəbul edildi. Daha sonra Prezident İlham Əliyev isə Müstəqillik Günü haqqında Azərbaycan Respublikasının Qanununu təsdiq etdi. Qanun layihəsinə görə, artıq oktyabrın 18-i Müstəqilliyin Bərpası Günü kimi qeyd olunacaq. Bu il 30-cu il ili qeyd olunacaq Müstəqilliyin Bərpasının Günü həm də Vətən müharibəsinin, ərazilərin işğaldan azad olunmasının ilk ildönümü kimi də qeyd olunur.

Milli Məclisin deputatı Məlahət İbrahimqızı Demokrat.az-a verdiyi açıqlamasında Azərbaycan xalqının Müstəqilliyin Bərpası Gününü fərqli sevinclə qeyd etdiyini bildirib:

“Artıq 18 oktyabrı Müstəqilliyimizin Bərpası Günü kimi qeyd edəcəyik və ilk dəfədir ki, bu günə alnıaçıq, fərəhlə, qürurla hazırlaşırıq. Hər xalqa müstəqilliyə qovuşmaq nəsib olmur. Dünyada 5 minə qədər xalq olsa da, onlardan yalnız 200 xalq müstəqil dövlətdə yaşaya bilir. Müstəqil dövlətdə yaşamaq şərəf, qürurdur. Müstəqilliyimiz gələcək nəsillər üçün strateji, tükənməz sərvətdir.

29 ildir bu günü nisgillə, kədərlə keçirmişik, torpaqlarımızın işğalda olması sevincimizi tam yaşamağımıza imkan verməyib. Hər il bu əlamətdar gündə arzulamışıq ki, növbəti il bu tarixi günü torpaqları işğaldan azad edilən xalq kimi həmin torpaqlarda qeyd edək. Bu mənada bu il qeyd edəcəyimiz 30 illik yubiley bizim üçün daha böyük mənada böyük sevinclə müşahidə edilir. İstər Azərbaycandakı vətəndaşlarımız, istərsə də dünyanın müxtəlif ölkələrində yaşayan soydaşlarımız bu günü daha qürurla, böyük sevinclə qeyd etməyə hazırlaşır. Keçən il 44 günlük müharibədə qazandığımız zəfər bir növ müstəqilliyimizin qarantıdır. Dünya dövlətləri və təşkilatları ərazi bütövlüyümüzü tanısa da, torpaqlarımızın işğalda olması bizi məyus etməklə yanaşı, həm də sevincimizə kölgə salırdı. Bu baxımdan, Müstəqilliyin Bərpası Günü ilə müharibədəki qələbəmiz bir-birilə vəhdət təşkil edir. Bu zəfər müstəqilliyimizin bərpasının nidası oldu. Müstəqillik və ərazi bütövlüyü ifadələri artıq bir-birini tamamlayır. Biz müstəqilliyimizi asan qazanmamışıq. Biz soyqırımı, faciələr yaşayaraq, 20 Yanvar kimi hadisədən keçərək müstəqilliyimizi əldə edə bildik. Bu mənada, uzun illər kədər, acı yaşayan xalq bu il ilk dəfə fərəh və qürurla 18 oktyabrı qeyd edəcək”.

Deputat həm müstəqillikdə, həm də ərazi bütövlüyünün təminatında şəhid və qazilərin böyük ehtiramla xatırlandığını bildirib:

“Müstəqillik və ərazi bütövlüyü dedikdə, mən şəhidlərimizi, qazilərimizi xatırlayıram. Həm müstəqilliyimiz, həm də ərazi bütövlüyümüz onların canı, qanı ilə əldə edilib. Buna görə də, bugünkü hisslərimizi, qürurumuzu onlara borcluyuq və bu borc əbədidir. Vətənimizin hər qarışının şəhidlərimiz tərəfindən bizə əmanət buraxıldığını unutmamalıyıq”.

Tarixçi Firdovsiyyə Əhmədova bildirir ki, bu il 18 oktyabr əhəmiyyətini daha yaxşı anladığımız və daha qürurla qeyd etdiyimiz tarixdir:

“Biz uzun illər 18 oktyabrı Dövlət müstəqilliyi haqqında Konstitusiya Aktının qəbul olunduğu gün kimi qeyd edirdik. Torpaqlar işğal altında olarkən, ərazi bütövlüyü tam təmin olunmadığı halda o günün təntənəsini duymaq, dərindən hiss etmək çətin idi. Hər il ümid edilirdi ki, torpaqlar işğaldan azad olunsun və bu əlamətdar günü daha ovqatla qeyd edək.

Sevindirici haldır ki, müstəqillik haqqında aktın qəbul olunmasının 30-cu il dönümündə xalqımızda fərqli əhval var. Biz həm müstəqilliyimizin bərpasının 30-cu il dönümünü qeyd edirik, həm də 44 günlük Vətən müharibəsinin, torpaqlarımızın azad edilməsinin birinci ildönümünü yaşayırıq. Bu, böyük andır, tarixdir”.

F.Əhmədova qeyd edir ki, bu günün və bu günü bizə yaşadanları, miras qoyanları xatırlamaq və xatırlatmaq əhəmiyyətlidir:

“Hər bir tarixi günü qeyd edərkən, onun mahiyyətini anlamaq, cəmiyyətə doğru çatdırmaq lazımdır. 1991-ci ilin 18 oktyabrına qədərki yol Azərbaycan xalqının əzmiylə, müstəqillik yolunda addım-addım hüquqi müstəvidə qərarların qəbul edilməsi ilə yadda qalıb. Azərbaycan xalqı böyük yol keçdi. Bu baxımdan, müstəqilliyin əldə edilməsində və bərpasında, bugünkü zəfərin qazanılmasında haqqı olan şəxsləri anmaq lazımdır. Müstəqilliyin qazanılmasında əməyi olan şəxslər tarixdə hörmətlə xatırlanırsa, adları əbədiləşdirilirsə, demək bu dəyərlər gələcək nəsillər tərəfindən də yaşadılacaq. Biz bu günü qürurla qeyd edirik. Gələcək nəsillərin də tarixi günü lazımi şəkildə qiymətləndirməsinə, mahiyyətini anlamasına çalışmalıyıq”.

Aygül Qarayeva Material Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır

Demokrat.az