Azərbaycanın beynəlxalq təşkilatlarla münasibətlərində yeni sistemlər yaranıb — RƏYLƏR

Artıq Dağlıq Qarabağ münaqişəsi tarixə qovuşdu. Azərbaycan 30 illik münaqişəyə son qoydu, hərbi-siyasi yollarla özünün ərazi bütövlüyünü və tarixi ədaləti bərpa etdi. Qırx dörd günlük müharibə nəticəsində tam məğlubiyyətə uğrayan Ermənistan 2020-ci il noyabrın 10-da kapitulyasiya aktına imza ataraq, Azərbaycanın işğal altındakı digər ərazilərindən qoşunlarını çıxarmağa məcbur oldu. Azərbaycan özü BMT Təhlükəsizlik Şurasının münaqişə ilə bağlı qəbul etdiyi qətnamələrin icrasını təmin etdi.

Qoşulmama Hərəkatı ölkələrinin beynəlxalq hüquqa və BMT Təhlükəsizlik Şurasının qətnamələrinə uyğun olaraq, Azərbaycanın ərazi bütövlüyünə və suverenliyinə müntəzəm dəstəyi çox qiymətlidir. Bakı Zirvə görüşünün Yekun Sənədində Qoşulmama Hərəkatı ölkələri ərazilərin güc yolu ilə zəbt olunmasının yolverilməzliyini vurğuladılar və təsdiq etdilər ki, heç bir dövlət Azərbaycan Respublikasının ərazilərinin işğalı nəticəsində yaranmış vəziyyətin qanuniliyini tanımayacaq. Qısa müddət ərzində ölkəmiz Hərəkatda olduqca böyük nüfuz və etimad qazanıb. 2016-cı ildə bütün üzv dövlətlərin yekdil qərarı ilə 2019-2022-ci illər üçün Qoşulmama Hərəkatına sədrlik Azərbaycana həvalə edilib.

“Azərbaycan hər zaman beynəlxalq təşkilatlarla qarşılıqlı əməkdaşlığı inkişaf etdirməyə çalışan, beynəlxalq hüquqa hörmət və sadiqlik nümayiş etdirən ölkələrdən biridir. 44 günlük Vətən müharibəsindən sonra Azərbaycan istər beynəlxalq münasibətlər sistemində, istərsə də digər platformalarda yeni mərhələyə qədəm qoydu. Bunun əsas səbəbi, torpaqlarımızın işğaldan azad olunması nəticəsində yeni geosiyasi reallıqların yaranması, yeni mənzərəyə uyğun addımların atılmasının vacibliyidir”.

Bu sözləri Demokrat.az-a açıqlamasında Milli Məclisin deputatı Cavid Osmanov bildirib.

Deputat Azərbaycanın region ölkələri və beynəlxalq təşkilatlarla münasibətlərində yeni sistemlərin yarandığını qeyd edib:

“İndiki mərhələdə Azərbaycan BMT-dən sonra təsisastına görə dünyanın ən böyük ikinci təşkilatı olan Qoşulmama Hərəkatına sədrlik edir. Azərbaycanın sədrliyi dövrü Qoşulmama Hərəkatının tarixində ən yadda qalan dövr kimi qiymətləndirilə bilər. Bunun əyani sübutu təşkilatın üzv ölkələrinin Azərbaycanı nəzərdə tutulandan 1 il artıq sədrlik etməsi üçün yekdilliklə dəstək olmaları və bunun üçün Azərbaycana minnətdarlıq ifadə etmələridir. Azərbaycan həm BMT, həm Qoşulmama Hərəkatı, həm də digər beynəlxalq təşkilatlarla yeni əlaqələr, əməkdaşlıq platformaları axtaran ölkədir. Yeni geosiyasi reallıqlara uyğun olaraq, Azərbaycan Prezidenti İlham Əliyevin rəhbərliyi ilə beynəlxalq münasibətlər sistemində də yeni mərhələ başlayır. Bu mərhələnin təşəbbüskarı Azərbaycandır”.

Deputat artıq beynəlxalq təşkilatların Azərbaycanla əməkdaşlıq üçün səy göstərdiyini, yeni münasibətlər sisteminin yaranması istiqamətində çalışdığını vurğulayıb:

“Bir neçə gün əvvəl Prezident İlham Əliyev BMT-nin yeni rezident əlaqələndiricisi Vladanka Andreyevanı qəbul etdi və görüşdə Azərbaycanla BMT arasında yeni əməkdaşlıqların həyata keçirilməsi təşəbbüsü ilə çıxış etdi. Prezident bu görüşdə də qeyd etdi ki, indiki mərhələdə BMT Ermənistanın mina xəritələrini Azərbaycana verməsi ilə bağlı öz təsir gücündən istifadə edə bilər.

Həmçinin, məcburi köçkünlərin torpaqlarına qayıtması üçün təşkilatın bu sahə üzrə nümayəndələrinin fəaliyyətindən söhbət açıldı. Müşahidə edirik ki, artıq Azərbaycan dünyada daha nüfuzlu dövlətə çevrilib. Bu səbəblə, münasibətlərin inkişafında təkcə Azərbaycan maraqlı deyil. Beynəlxalq təşkilatlar da Azərbaycanla yeni münasibətlər qurmağa və mövcud əməkdaşlıqları inkişaf etdirməyə can atır. Bunun fonunda yeni təkliflər edilir, əməkdaşlıq platformaları tapılır. Azərbaycan hər zaman beynəlxalq hüquqa və əməkdaşlığa sadiqdir”.

“Azərbaycanın xarici siyasət strategiyası tərəfdaşlığa, bir sıra ölkələrlə əməkdaşlığa və beynəlxalq hüquq normalarına hörmətə söykənir. Azərbaycan müharibədən sonrakı dövrdə də beynəlxalq təşkilatlarla münasibətlərinin inkişafı istiqamətində addımlar atır”.

Bu fikirləri Demokrat.az-a açıqlamasında Milli Məclisin deputatı, Azərbaycan Demokratik İslahatlar Partiyasının sədri Asim Mollazadə bildirib.

O, Azərbaycanın regionda strateji layihələr həyata keçirməsinin və uğurlu tərəfdaşlıqlarının bölgədə sülhün təminatında vacib rol oynadığını bildirib:

“Təəssüflər olsun ki, çox hallarda beynəlxalq təşkilatların ikili standarlarının şahidi olmuşuq, 30 ilə qədər müddətdə BMT Təhlükəsizlik Şurasının qətnamələri qəbul edilməyib. ATƏT-in Minsk qrupu isə yalnız bölgəyə turizm səfərləri etməklə məşğul olub. Azərbaycan Minsk qrupunun işini özü gördü və münaqişəni qələbə ilə başa çatdırdı. Bütün bunlara baxmayaraq, Azərbaycan yenə də bölgədə tərəfdaşlığı, strateji layihələri həyata keçirməkdə davam edir. Bu siyasət Azərbaycana hər zaman hörmət qazandırıb.

Ölkəmiz Qoşulmama Hərəkətına uğurlu sədrlik fəaliyyətini davam etdirir. BMT-nin Baş Assambleyasının COVID-19-la birgə mübarizədə, pandemiyanın qarşısının alınması ilə bağlı təkliflərini irəli sürdü. Azərbaycanın səyləri ilə vaksin əldə etmək imkanı məhdud olan ölkələr vaksinlə təmin edildi. Həmçinin, regional təşkilatlarda da Azərbaycan uğurlu layihələrlə iştirak edir və dəstək verir. Bu, Azərbaycanın digər ölkələr və təşkilatlarla əməkdaşlıq imkanlarını artırır. Əminəm ki, Azərbaycan bu siyasəti davam etdirərək, bölgədə sülhə və sabitliyə nail olacaq. Bu siyasət sülhün təminatında vacib rol oynayır”.

Aygül Qarayeva Yazı Azərbaycan Respublikası Medianın İnkişafı Agentliyinin maliyyə dəstəyi ilə hazırlanıb

Demokrat.az