"Hərbçilərimizin Əfqanıstandakı fəaliyyəti sülhməramlıların davranışı ilə bağlı dünyaya dərs oldu"

“Azərbaycanlı hərbçilərin Əfqanıstandakı fəaliyyəti dünyaya sülhməramlıların davranışı ilə bağlı dərs oldu. Azərbaycanlı sülhməramlılar hərəkətləri, peşəkarlığı ilə sülhməramlı necə olmalıdır, bunu göstərirlər”. Bu sözləri Demokrat.az-a açıqlamasında siyasi şərhçi Əziz Əlibəyli bildirib. Azərbaycanlı sülhməramlılarının Əfqanıstakı yüksək peşəkarlıq və insanlıq davranışı ilə bağlı danışan politoloq, Azərbaycan hərbçilərinin bu bölgədə qalacağını düşünür: “Qarabağdakı sülhməramlı qüvvələrin fəaliyyətindən narazı olduğumuz bir dövrdə azərbaycanlı hərbçilər Əfqanıstanda öz missiyalarına, sülhməramlı kimi vəzifələrinə sadiq olduqlarını göstərirlər. Azərbaycanlı sülhməramlı qüvvələrinin fəaliyyəti digər ölkələr və beynəlxalq birliklər tərəfindən də yüksək qiymətləndirilir. Onların fəaliyyəti ilə bağlı yayılan fotolar, videolar dünya ictimaiyyətinin diqqətini cəlb edir. Əfqanıstanda insanlıq faciəsi yaşanır. Azərbaycanlı sülhməramlı hərbçilərinin belə həssas bir məqamda yüksək fəaliyyəti göz önündədir.

Düşünürəm ki, Azərbaycan Türkiyə ilə birlikdə ordusunu Əfqanıstanda saxlayacaq. Bu, strateji məsələdir və hər iki ölkənin beynəlxalq vəzifələri var. Bu vəzifələrin yerinə yetirilməsi üçün mütləq şəkildə Əfqanıstanda bu fəaliyyəti davam etdirmək, hətta genişləndirmək lazımdır. Xüsusilə, 44 günlük müharibədən sonra ordumuzla bağlı dünyanın müxtəlif ölkələrində araşdırmalar aparılmaqdadır. Bu araşdırmalarda ordumuzun yüksək davranış nümunələri ortaya qoyulur. Yüksək peşəkarlığa malik ordu, psixoloji-mənəvi hazırlıq bu araşdırmalarda görünən əsas nüanslardandır. Məhz Vətən müharibəsindən sonra Əfqanıstanda yaşanılanlar, azərbaycanlı sülhməramlılarının yüksək davranışları Azərbaycan ordusunun imicinin dünyada məşhurlaşmasına və yüksəlməsində böyük rol oynadı. Bu, bizim prizmamızdan qürurvericidir”.

Aygül Qarayeva Demokrat.az