Əməkdar artist Bəhram Bağırzadə Rusiyanın Xalq artisti Valeri Meladze ilə bağlı paylaşım edib.
Demokrat.az xəbər verir ki, sənətçi 30 il əvvəl Bakıda, Heydər Əliyev Sarayında çəkilən fotosunu yayımlayıb. O, müğənni ilə görüşünü xatırlayaraq bunları yazıb:
"Elə fotolar var ki, zaman keçdikcə daha da qiymətli olur. Təxminən 30 il əvvəl Bakıda, Heydər Əliyev Sarayında çəkilən bu fotoda yanımda Valeri Meladze dayanıb. Mənim üçün Valeri postsovet məkanının ən istedadlı və xarizmatik sənətçilərindən biridir. Onun səsini ilk notlardan tanımaq mümkündür: bu səsdə həm güc, həm zəriflik, həm də insanın qəlbinə toxunan xüsusi bir ahəng var. Onun mahnıları şəxsi xatirələrimizin bir hissəsinə çevrilir və buna görə də uzun illər bizimlə qalır.
Amma səhnə parıltısının arxasında hər zaman insanı görmək istəyirsən. Mən də Bakıda baş tutan bu görüşü xoş hisslərlə xatırlayıram, sadə, səmimi və insani bir görüş idi. Bu foto yalnız üzləri deyil, yaradıcılığına çoxdan səmimi heyranlıq duyduğum sənətçinin yanında hiss etdiyim sevinc hissini də qoruyub saxlayıb.
Əziz Valeri, musiqinizə, bənzərsiz səsinizə və insanlara bəxş etdiyiniz duyğulara görə təşəkkür edirəm. Qarşıda sizi daha çox gözəl mahnılar, səmimi görüşlər və xoşbəxt anlar gözləsin. Bu foto mənim Bakıdan salamım və böyük minnətdarlıqla qoruduğum görüşün xatirəsidir". (axşam.az)
