Yastıqların üzərində zamanla yaranan sarı ləkələr təkcə estetik problem deyil. Tər, dəri yağı, tüpürcək, ölü dəri hüceyrələri və saçlara qulluq vasitələrinin qalıqları parçaya hoparaq belə izlər yarada bilər. Mütəxəssislər bildirirlər ki, yastığa düzgün qulluq edilməməsi allergiya və dəri problemlərinin yaranma riskini də artıra bilər.
Demokrat.az xəbər verir ki, bu barədə "SheKnows" nəşri dermatoloq Şamsa Kanvalın açıqlamalarına istinadən yazıb.
Dermatoloqun sözlərinə görə, gecə ərzində ifraz olunan tər və dərinin təbii yağı yastıq üzündən keçərək onun içərisinə hopur. Hava ilə təmas nəticəsində bu maddələr oksidləşir və zamanla sarı rəngli ləkələr əmələ gətirir. Yuxu zamanı çox tərləyən insanlarda bu proses daha sürətli baş verə bilər.
Üz kremləri, kosmetik vasitələr və saç üçün istifadə edilən yuyulmayan kondisionerlər də ləkələrin yaranmasına səbəb olur. Hətta yastıq üzü mütəmadi yuyulsa belə, bu maddələrin bir hissəsi parçadan keçərək yastığın özünə hopa bilər.
Mütəxəssislər qeyd edirlər ki, insan yuxu zamanı nəfəsalma və tərləmə nəticəsində təxminən yarım litrdən bir litrə qədər maye itirə bilər. Bu göstərici bədən quruluşundan, maddələr mübadiləsindən və otağın temperaturundan asılıdır.
Sarı ləkələr dəri və allergiya problemləri ilə əlaqəli ola bilər
Saç və dəriyə qulluq vasitələrinin qalıqları yalnız yastığın rəngini dəyişmir. Amerika Dermatologiya Akademiyasının məlumatına görə, bəzi kondisioner və saç düzümü məhsullarında olan yağlar məsamələri tıxayaraq saç xətti boyunca, alın və boyun nahiyəsində sızanaqların yaranmasına səbəb ola bilər.
Bundan başqa, nəm və isti yataq dəstləri toz gənələrinin çoxalması üçün əlverişli mühit yaradır. Bu canlıların allergenləri asqırma, burun tutulması və astma əlamətlərini gücləndirə bilər.
Milli Ekzema Assosiasiyasının nəzərdən keçirdiyi araşdırmalarda isə "Staphylococcus aureus" bakteriyasının yüksək səviyyəsinin ekzemanın daha ağır keçməsi ilə əlaqəli olduğu göstərilib. Bununla belə, bu, sarı ləkəli yastığın birbaşa ekzema yaratdığı anlamına gəlmir.
Yastığa necə qulluq etmək lazımdır?
Dermatoloq Şamsa Kanval yastıq üzlərinin ən azı həftədə bir dəfə yuyulmasını tövsiyə edir. Çox tərləyən, yağlı və ya sızanağa meyilli dəriyə sahib olan, eləcə də çoxlu kosmetik vasitələrdən istifadə edən şəxslər yataq dəstlərini daha tez-tez dəyişməlidirlər.
Yastığın içərisinə nəmin və kosmetik vasitələrin hopmasının qarşısını almaq üçün yuyula bilən əlavə qoruyucu üzlükdən istifadə etmək də məsləhətdir.
Mütəxəssis üzə qulluq vasitələrinin yatmazdan ən azı bir saat əvvəl çəkilməsini tövsiyə edir. Bu, kremlərin dəriyə hopmasına imkan verir və onların yastığa keçmə ehtimalını azaldır. Həmçinin yatmazdan əvvəl yaş saçları qurutmaq vacibdir. Çünki yastıqda qalan nəmlik bakteriyaların çoxalmasına şərait yarada bilər.
Yastığın özü də üzərindəki etiketdə göstərilən qaydalara uyğun yuyulmalıdır. Bəzi modelləri paltaryuyan maşında yumaq mümkün olduğu halda, digərləri yalnız müəyyən hissələrdən təmizlənməlidir. Yastıq üzünü taxmazdan əvvəl onun tam quruduğuna əmin olmaq lazımdır.
Yuxu Fondunun məlumatına görə, materialından və qulluq şəraitindən asılı olaraq, yastıqların əksəriyyətini hər 1-2 ildən bir dəyişdirmək tövsiyə olunur.
