Qızılbalıq bişirərkən əksər insanların tulladığı balıq dərisindən dadlı və xırtıldayan qəlyanaltı hazırlamaq mümkündür. Kulinariya mütəxəssisləri bu məhsulun düzgün emal edildikdə həm müstəqil qəlyanaltı, həm də salatlara əlavə kimi istifadə oluna biləcəyini bildirirlər.
Demokrat.az xəbər verir ki, bu barədə "El Español" məlumat yayıb.
Malaqalı balıq satıcısı Fran Rodriges qızılbalıq dərisindən çips hazırlamağın sadə üsulunu bölüşüb. Onun sözlərinə görə, ilk növbədə dərini pulcuqlardan və artıq piydən təmizləmək, daha sonra isə yaxşıca qurutmaq lazımdır.
Bunun üçün balıq dərisi perqament kağızı sərilmiş soba sinisinə yerləşdirilir, üzəri ikinci perqament vərəqi ilə örtülür və 90 dərəcə temperaturda təxminən bir saat qurudulur. Dəri tamamilə sərtləşdikdən sonra onu tavada cəmi bir neçə saniyə yüngülcə qızartmaq kifayətdir.
Rodriges bildirir ki, xırtıldayan nəticə əldə etməyin əsas sirri dərinin sobada kifayət qədər qurudulmasıdır. Əks halda, tərkibində qalan nəmlik qızartma zamanı buxarlanaraq məhsulun qızarmaq əvəzinə bişməsinə səbəb ola bilər.
Hazır qəlyanaltını ayrıca yemək və ya salatlara əlavə etmək mümkündür.
Qeyd olunur ki, qızılbalığın dərisində də balığın özündə olan bəzi qida maddələri, o cümlədən zülal və çoxlu doymamış yağlar mövcuddur. Mütəxəssislər dərinin düzgün təmizlənib hazırlanması şərtilə istehlakına xüsusi qadağa olmadığını bildirirlər.
