Balı qaynar çaya əlavə etdikdə onun bütün faydalı xüsusiyyətlərini itirdiyi barədə fikir tam doğru deyil. Həkimlərin sözlərinə görə, yüksək temperatur balın tərkibindəki bəzi aktiv maddələrə təsir göstərsə də, onun əsas qida xüsusiyyətləri, o cümlədən karbohidratları qorunub saxlanılır.
Demokrat.az xəbər verir ki, bu barədə rusiyalı qastroenteroloq Yevgeni Belousov "Gazeta.Ru" nəşrinə açıqlamasında bildirib.
Mütəxəssis qeyd edib ki, balın faydasını qiymətləndirərkən yalnız çayın temperaturunu deyil, gündəlik qidalanmada qəbul edilən miqdarı da nəzərə almaq lazımdır. Təbii məhsul olsa da, bal sadə şəkərlərlə zəngindir və həddindən artıq istehlak edilməsi məqsədəuyğun deyil.
Həkimin sözlərinə görə, ballı çay çox vaxt müalicəvi içki kimi qəbul edilir. Lakin bal dərman deyil və soyuqdəymədən tam qorunmağa zəmanət vermir. Onu xəstəliklərin müalicəsini əvəz edən vasitə kimi qəbul etmək düzgün deyil.
Balı çaya nə vaxt əlavə etmək daha yaxşıdır?
Belousovun sözlərinə görə, balı çox qaynar içkiyə qatmaq ən yaxşı seçim sayılmır. Yüksək temperatur məhsulun dadını dəyişə və bəzi faydalı xüsusiyyətlərini azalda bilər. Buna görə balı çay bir qədər soyuduqdan sonra əlavə etmək məsləhətdir.
Qastroenteroloq onu da vurğulayıb ki, bəzi insanlarda çox miqdarda şirin qidalar həzm sistemi ilə bağlı narahatlıqlara, o cümlədən köpə səbəb ola bilər. Bundan başqa, bal allergik reaksiyalar da yarada bilər.
Bir yaşına çatmamış uşaqlara bal vermək olmaz
Mütəxəssis xüsusilə körpələrlə bağlı vacib xəbərdarlıq edib. Bal bir yaşına çatmamış uşaqlara verilməməlidir. Bunun səbəbi körpələrdə ağır fəsadlara yol aça bilən botulizm riskidir.
Həkim hesab edir ki, balı sevən insanların bu vərdişdən tamamilə imtina etməsinə ehtiyac yoxdur. Əsas məsələ məhsulu ölçülü miqdarda istehlak etmək və onu bütün xəstəliklərə qarşı universal vasitə kimi görməməkdir.
Beləliklə, balı isti çaya əlavə etməyə qəti qadağa yoxdur. Ancaq onun bəzi faydalı xüsusiyyətlərini daha yaxşı qorumaq üçün içkinin bir qədər soyumasını gözləmək məqsədəuyğundur. Sağlamlığın qorunmasında isə tək bir məhsuldan daha çox, ümumi qidalanma vərdişləri əhəmiyyət daşıyır.
Jalə
