Payız kələm turşusu hazırlamaq üçün ən münasib mövsüm hesab olunur. Xırtıldayan və dadlı turşu əldə etmək üçün isə duz və şəkərin miqdarına, eləcə də fermentasiya prosesinin düzgün aparılmasına diqqət yetirmək lazımdır.
Demokrat.az xəbər verir ki, üç litrlik banka üçün klassik reseptdə təxminən 2 kiloqram ağ kələm və 1 litr su istifadə olunur. Duz və şəkərin düzgün nisbəti kələmin dadına və fermentasiya prosesinə təsir göstərir.
İnqrediyentlər:
- 2 kq ağ kələm;
- 1 litr su;
- 2 xörək qaşığı duz;
- 1 xörək qaşığı şəkər;
- İstəyə görə 1-2 kiçik qıtıqotu kökü;
- Bir neçə dənə qara istiot;
- Qurudulmuş şüyüd.
Hazırlanma qaydası
Əvvəlcə kələmin zədələnmiş üst yarpaqları çıxarılır, kələm yuyulur və doğranır. Daha sonra üç litrlik bankaya yerləşdirilir. Fermentasiya zamanı həcmin artacağını nəzərə alaraq bankanın yuxarı hissəsində bir qədər boş yer saxlamaq məsləhətdir.
Duz və şəkər suda həll edilərək duzlu məhlul hazırlanır. Məhlul kələmin üzərinə tökülür və tərəvəzin tamamilə mayenin altında qalmasına diqqət yetirilir. Lazım gələrsə, kələmin üzərinə ağırlıq qoymaq olar.
Fermentasiya zamanı qaz yarandığı üçün bankanı dərhal hermetik şəkildə bağlamaq olmaz. Qazın çıxmasına imkan verən qapaqdan istifadə etmək və ya qabı uyğun şəkildə örtmək lazımdır. Hazırlanma prosesi otaq temperaturunda, birbaşa günəş işığı düşməyən yerdə aparılır.
Kələmin fermentasiyası təxminən 2-4 həftə davam edə bilər. Turşu istənilən dada çatdıqdan sonra banka möhkəm bağlanaraq soyuducuya yerləşdirilir.
Hazırlanma və saxlanma müddətində kələmin vəziyyətinə nəzarət etmək vacibdir. Kələmdə kif yaranarsa və ya xoşagəlməz qoxu hiss edilərsə, onu dadmaq və istehlak etmək olmaz.
Qeyd edək ki, reseptdə göstərilən su və duz nisbəti məhlulun hazırlanması üçündür. Duzun miqdarını ölçərkən qaşığın doluluğundan asılı olaraq fərq yarana biləcəyini nəzərə almaq lazımdır.
Jalə
