Qış üçün ənbər rəngli heyva mürəbbəsi: Qədim reseptlə necə hazırlanır?
Heyvadan hazırlanan şəffaf, ənbər rəngli mürəbbə həm görünüşü, həm də ətri ilə seçilir. Düzgün bişirildikdə meyvə dilimləri qızılı rəng alır, şərbət isə qatılaşaraq iştahaçan görünüş qazanır. Bu ənənəvi reseptlə mürəbbə hazırlamaq üçün mürəkkəb üsullara ehtiyac yoxdur.
Demokrat.az xəbər verir ki, Ukraynanın UNİAN nəşri qış üçün heyva mürəbbəsinin iki fərqli hazırlanma qaydasını təqdim edib.
Ənənəvi heyva mürəbbəsi üçün lazım olan ərzaqlar:
- 1,5 kq heyva
- 1 kq şəkər tozu
- 1 litr su
- 1 limon
Əvvəlcə heyvalar yaxşıca yuyulur və kub şəklində doğranaraq böyük qazana tökülür. Üzərinə su, şəkər tozu və təzə sıxılmış limon suyu əlavə edilir. Qarışıq orta odda təxminən bir saat bişirilir. Bu müddətdə suyun bir hissəsi buxarlanmalı, şərbət qatılaşmalı, heyva dilimləri isə qızılı rəng almalıdır. Hazır mürəbbə isti halda əvvəlcədən sterilizə edilmiş bankalara doldurulur və qapaqları bağlanır.
Şəkərsiz heyva mürəbbəsi də hazırlamaq mümkündür. Bunun üçün 5 ədəd heyva, 2 alma, 1 litr su və 300 ml limon suyu lazımdır.
Heyva və almaların qabığı soyulur, çəyirdəkləri çıxarılır. Meyvələr sürtgəcdən keçirilir və ya blenderdə xırdalanır. Qarışıq su ilə birlikdə zəif odda 20-30 dəqiqə bişirilir. Daha sonra limon suyu əlavə olunur və bişirmə prosesi daha 30 dəqiqə davam etdirilir. Hazır qarışıq sterilizə edilmiş bankalara doldurulur.
Nəşr qeyd edir ki, şəkərsiz variant şirinləşdirici əlavə etmədən mürəbbə hazırlamaq istəyənlər üçün alternativdir. Bununla belə, şəkərsiz hazırlanması onun diabetli insanlar üçün avtomatik olaraq təhlükəsiz olması demək deyil: heyva və alma da təbii şəkərlər ehtiva edir.
Jalə
