Numerologiyada insan həyatının doqquzillik dövrlərdən ibarət olduğu və hər ilin özünəməxsus enerjiyə malik olduğu düşünülür. Bu yanaşmaya əsasən, doğum tarixindən istifadə etməklə 2027-ci ilin insan üçün hansı mövzularla əlaqəli olacağını hesablamaq mümkündür.
Demokrat.az "Times of India" nəşrinə istinadən xəbər verir ki, bunun üçün doğum gününün rəqəmi, doğulan ayın sıra nömrəsi və 2027-ci ilin rəqəmləri toplanır. Əvvəlcə bütün rəqəmlər birrəqəmli ədədə endirilir. 2027-ci ilin rəqəmlərinin cəmi 11 edir və bu da 2-yə qədər sadələşdirilir.
Məsələn, 14 mart tarixində doğulan şəxsin günü 1+4=5, mart isə 3 kimi hesablanır. Daha sonra 5+3+2=10 və 1+0=1 alınır. Beləliklə, bu şəxsin 2027-ci il üçün numeroloji rəqəmi 1 hesab olunur.
Numerologiyaya görə, 1-ci şəxsi il yeni doqquzillik dövrün başlanğıcıdır. Bu mərhələ yeni işə başlamaq, köçmək və ya şəxsi biznes qurmaq kimi dəyişikliklərlə əlaqələndirilir. 2-ci il səbir və əməkdaşlıq dövrü sayılır. Münasibətlər, tərəfdaşlıq və mühüm razılaşmalar ön plana çıxa bilər. 3-cü il isə ünsiyyət, yaradıcılıq və sosial aktivliklə əlaqələndirilir.
4-cü şəxsi il daha çox zəhmət, məsuliyyət və gələcək üçün möhkəm təməl yaratmaqla bağlıdır. 5-ci il dəyişikliklər, səyahətlər və yeni imkanlarla, 6-cı il isə ailə, ev və yaxınlarla bağlı məsələlərlə əlaqələndirilir.
7-ci il daxili inkişaf, düşünmək və öyrənmək üçün əlverişli dövr kimi təqdim edilir. 8-ci il karyera, maliyyə və görülən işlərin nəticələrini əldə etməklə əlaqələndirilir. 9-cu il isə doqquzillik dövrün sonu hesab olunur və köhnə məsələlərin bağlanması, artıq ehtiyac olmayan münasibət və vərdişlərdən uzaqlaşmaq mərhələsi kimi şərh edilir.
Jalə
