Smartfonu hər gün tam doldurmaq batareyanın ömrünə təsir göstərə bilər. Mütəxəssislər bildirirlər ki, akkumulyatorun uzun müddət yüksək enerji səviyyəsində qalması onun kimyəvi aşınmasını sürətləndirə bilər. Bununla belə, telefonu hər dəfə 100 faizə qədər doldurmaqdan tamamilə imtina etmək də vacib deyil.
Demokrat.az xəbər verir ki, bu barədə UNIAN nəşri "HuffPost"a istinadən yazıb.
Pensilvaniya Universitetinin Elektrokimyəvi Mühərriklər Mərkəzinin direktoru Çao-Yan Vanın sözlərinə görə, telefonu mütəmadi olaraq 100 faizə qədər doldurmaq batareyanın ümumi istifadə müddəti ərzində onun aşınmasını 90 faizə qədər doldurmaqla müqayisədə təxminən 10-15 faiz sürətləndirə bilər.
Ekspertin fikrincə, gündəlik istifadə zamanı batareyanın enerji səviyyəsini 85-90 faiz civarında saxlamaq onun ömrünü uzatmağa kömək edə bilər. Telefonun uzun müddət lazım olacağı səfərlər və ya gərgin iş günləri öncəsi isə cihazı tam doldurmaq normaldır.
Mütəxəssislər həmçinin batareyanın tez-tez sıfıra qədər boşalmasına yol verməməyi tövsiyə edirlər. Enerji səviyyəsi təxminən 20 faizə düşəndə telefonu enerji mənbəyinə qoşmaq daha məqsədəuyğun sayılır. Beləliklə, gündəlik istifadə üçün 20-80 faiz aralığı batareyanın qorunmasına kömək edən yanaşmalardan biri hesab olunur.
Batareyanın ömrünə təsir edən əsas amillərdən biri də temperaturdur. Telefonu birbaşa günəş şüaları altında, qızmış avtomobildə və ya şaxtalı şəraitdə saxlamaq akkumulyatora zərər verə bilər. Sürətli enerji doldurma zamanı cihazın həddindən artıq qızması da uzunmüddətli aşınmanı sürətləndirə bilər. Buna görə vaxt imkan verdikdə daha yavaş enerji doldurma üsuluna üstünlük vermək məsləhətdir.
Batareyanın vəziyyətini telefonun parametrlərindən yoxlamaq mümkündür. Maksimal tutum 80 faizdən aşağı düşərsə, akkumulyatorun dəyişdirilməsi barədə düşünmək olar. Telefonun tez boşalması, gözlənilmədən sönməsi və əvvəlki ilə müqayisədə daha az enerji saxlaması da batareyanın yoxlanılması üçün əsasdır.
Qeyd edək ki, müasir smartfonlarda telefonu vaxtaşırı 100 faizə qədər doldurmaq normaldır. Batareyanın daha uzun müddət işləməsi üçün əsas məsələ tam dolumdan tamamilə imtina etmək deyil, həddindən artıq qızmanın qarşısını almaq və tez-tez dərin boşalmaya yol verməməkdir.
Jalə
